Fyrra hálvár av 2019 boðaðu norðurlendsk sjóvinnu-tryggingarfeløg frá 13 álvarsligum eldum umborð á bingjuskipum - og allir eldarnir byrjaðu í lastini. Somu tíð undanfarnu trý árini hevur talið á eldum verið tríggir, seks og sjey eldar.

Stjórin í felagnum fyri Sjóvinnu-tryggingarfeløg í Norðurlondum, Helle Hammer, heldur økingina vera ógvusliga. Men hetta undirstrikar eitt týðiligt rák seinastu tíðina, heldur hon.

Hvørki reiðaríini ella tryggingarfeløgini kunnu við vissu siga, at eldarnir eru byrjaðir í el-avfallinum í lastunum, men uttan mun til tað, so verður málið tikið upp í altjóða sjóvinnufelagsskapinum hjá ST, IMO, skjótast gjørligt.

NRK skrivar, at bara úr Noregi verða túsundtals gamlir bilar sendir til Afrika á hvørjum ári. Nógvir verða fyltir við avgomlum elektronikki og hvítvørum.

Bilarnir verða fermdir úr Kristiansand í Noregi til Hirtshals. Haðani fara teir við trailarum til havnina í Hamburg, og síðani við risastórum bingjuskipum til Nigeria, Kamerun og Ghana.