Eitt umboð fyri kurdiska herin ákærir Turkaland fyri at bróta vápnahvíldina. Norska tíðindastovan, NTB, sigur frá kurdiskum keldum, at hóast vápnahvíldina - hava áhaldandi loftálop verið ímóti hermonnum, sivilum og sjúkrahúsinum í Ras al-Ain.

Aftenposten skrivar nú seinnapartin, at amerikanski uttanríkisráðharrin, Mike Pompeo, skal hitta NATO-aðalskrivaran, Jens Stoltenberg, í dag. Har skal Pompeo kunna Stoltenberg um vápnahvíldar-avtaluna við Turkaland.

Tað var annars í gjárkvøldið at amerikanski varaforsetin, Mike Pence, boðaði frá, at Turkaland er gingið við til eina fimm daga vápnahvíld. Tað varð gjørt fyri at hálvvápnaðu kurdisku herliðini skuldu sleppa úr økinum við markið til Turkaland.

USA lovaði afturfyri at hjálpa kurdum, soleiðis, at afturtøkan gekk hóvliga fyri seg.

Enska blaðið, The Guardian, sigur, at hóast útsøgnina hjá Mike Pence í gjárkvøldi, so vilja vitni í býnum Ras al-Ayn við Turkisk-Sýriska markið vera við, at tað aftur vóru bardagar í morgun. Og tað hava kurdiskar keldur so váttað fyri norsku tíðindastovuni, NTB, seinnapartin í dag.

Og nú seinnapartin skrivar The Guardian, at OPCW, sum er felagsskapurin ímóti nýtslu av evnafrøðiligum vápnum, í morgun boðaði frá, at evnafrøðilig-eftirlitsfólk frá ST eru í ferð við at savna saman upplýsingar í samband við ákærur um, at Turkaland skal hava nýtt hvítt fosfor ímóti børnum í Sýria fyrr í vikuni.

Kurdiski Reyði krossur hevur úttalað seg um seks fólk, - bæði sivil og herfólk, sum eru á sjúkrahúsi í Hasakah við brennumerkjum frá “ókendum vápnum”. Tey eru - saman við altjóða samstarvsfeløgum - í ferð við at meta um, hvør orsøkin til serligu brennimerkini er.

Fyrrverandi herovastin í Bretska herliðnum fyri m.a. evnafrøði-, lívfrøði-, og kjarnorku, hevur í samband við myndir av brennimerkjunum sagt, at “tað er mest sannlíkt, at syndarin er hvítt fosfor.” Um tað er veruleiki, so hava turkar nýtt evnafrøðilig vápn í bardøgunum mótu sivilum kurdum.

Hvítt fosfor er ólóglit at brúka móti sivilfólki sambært altjóða reglum.