Ævisøga um kendan fuglfirðing - ein merkismaður
Ævisøga Ismar Joensens, fyrrverandi handilsmaður og lokalpolitikari í Fuglafirði, er nú niðurfeld í bók.
Tað eru synirnir Páll og Jóannes, sum hava staðið fyri arbeiðinum at skriva og savna tilfar um pápan. Bókin hevur heitið: Í SKRIFT OG TALU – ISMAR JOENSEN 100 ÁR.
Ismar var føddur 25. oktober 1919, og tað var júst á 100 ára degnum, seinasta fríggjadag, 25. oktober, at framløga var av bókini í Ribarhúsi í Fuglafirði, har nógv fólk var komið saman at minnast Ismar og síggja og hoyra umrøðuna av nýggju bókini. Tað vóru Eyðun á Lakjuni, Egon Øregaard og Óli Jacobsen, sum allir hava kent Ismar frá barnaárum av, ið hildu røðu undir framløguni. Teir lýstu Ismar við skemtiligum og álvarsomum lýsingum frá hvør sínum persónliga sjónarhorni.
Egon Øregaard skrivar í formælinum í bókini: "Ismar Joensen var ein merkismaður, sum setti sín dám á bygdina, tíðina og umhvørvið í Fuglafirði. Ismar var mentamaður, skald, talari og ein áhugaverdur og heilskapaður persónur.”
Bókin er gott 300 síður við nógvum myndum. Tað er forlagið Leirkerið, ið stendur sum útgevari. Í fyrsta lagið eru 1.000 bøkur prentaðar. Limir í bókaringinum Leirkerið fáa hana sendandi. Bókin er at fáa í bókabúðunum og kostar 300 krónur.
Kristiliga Tíðindatænastan
v/poul jóhan djurhuus
gjaranes@gmail.com
Mest lisið í farnu viku
Samband
Heygsvegur 8
490 Strendur