Spennandi at fara á Føroya Banka
-Vit hava fingið eitt royndarloyvi at royna á øllum Føroya banka, burtursæð frá tveimum økjum, har Magnus Heinason fekk mest tosk í summar. Høvuðsuppgávan er at fiska hýsu, tí mett verður, at hon er hampuliga væl fyri, meðan toskurin er illa fyri.-
Tað sigur Hjaltur Poulsen, skipari, á frysti- og línuskipinum, Ågot, úr Klaksvík, sum leygardagin loysti frá landi og setti kós móti Føroya banka.
-Vit fara at royna við vanligu línuni, men royna í stubbum. So fara vit at egna við ymiskum agni, men bara við einum slagi í senn. Tað vil siga, at vit til dømis, seta ein stubba við savri, ein við sild og ein við høgguslokki. Harvið vóna vit at fáa eina hóming av, hvat egnar seg best til hýsufiskiskap,- sigur Hjaltur.
-Tað hevur ongin veruligur fiskiskapur verið á bankanum í fleiri ár, so vit vita ikki nógv um støðuna á bankanum. Magnus Heinason hevur gjørt sínar árligu royndir, og so hevur línuskipið, Sandshavið, gjørt nakrar túrar og fekk væl av hýsu og t.d. skøtu, sigur Hjaltur.
-Hendan royndin er tí sera spennandi og áhugaverd – ikki bara fyri okkum umborð á Ågot, men fyri allar føroyskar sjómenn-, tí, hvussu er veruliga støðan hjá fiskinum á Føroya banka? Tað eru tað nógvar meiningar um. Vit hava ein mann við frá Havstovuni, sum fer at fylgja við og at kunna Havstovuna um fiskiskapin. Skuldi tað hent, at tað fer at vera ov nógvur toskur á línuni, so kann fiskiskapurin steðgast. Tí vóna vit at fáa hýsu og annan fisk, so vit kunnu royna í nakrar vikur, og harvið fáa nakað burturúr, samstundis sum vit fáa nakað at vita um støðuna hjá fiskastovninum á Føroya banka.- sigur Hjaltur Poulsen.
Áðrenn Ågot loysti var andakt umborð. Hugaligt var at uppliva, at umframt manningina, so var bæði familja og vinir við til andaktina.
Enda var við sanginum:
Eg má hava Jesus við mær, ganga eina kann eg ei.
Eg má vita hann er hjá mær, og at hannn mær lýsir leið.
Í hans fylgi her er trygt, har mín sál er uttan frygt.
Glaður í hans spor eg stígi, øll mín vón á hann er bygd.
Teimum og sjófólkunum annars verður ynskt Guds signing og varðveitslu.
Kelda: Føroyska Sjómansmissiónin á facebook.
Sí fleiri myndir her: facebook.com/sjomansmissionin
Mest lisið í farnu viku
Samband
Heygsvegur 8
490 Strendur