Felagsskapurin eitur Global Ghost Gear.  Norski veðurlags- og umhvørvisráðharrin, Ola Elvestuen, undirskrivaði avtaluna á havráðstevnuni, Our Ocean, sum hevur verið í Oslo.

Global Ghost Gear er eitt samstarv millum myndugleikar, vinnulív og felagsskapir, sum arbeiða við at loysa trupulleikan við fiskaútgerð, sum er tveitt burtur, eftirlátin ella mist. Hetta er tað, sum á fakmáli verður rópt “spøkilsisreiðskapur” ella skuggareiðskapur, tí reiðskapurin heldur fram at fiska fisk og eisini onnur sløg í sjónum, sum kvalast, hungra íhel og soleiðis gerast fóður hjá øðrum djórum.

“At minka um fiskireiðskap, sum verður liggjandi í sjónum, er týdningarmikið fyri arbeiðið ímóti at havið gerst eitt skrellipláss - og fyri burðardyggum fiskiskapi um allan heim. Hetta samstarv er eitt gott altjóða stað, har vit kunnu hittast at luta vitan og royndir millum myndugleikar, vinnulív og felagsskapir, sigur norski veðurlags- og umhvørvisráðharrin, Ola Elvestuen.

GGGI, sum felagsskapurin verður styttur, hevur limir úr 15 londum. Haraftrat eru umleið 100 matvøru-felagsskapir og aðrir vitunarfelagsskapir limir í GGGI.

Síðani 1983 hevur norska Fiskivinnustovan staðið fyri at savna mista fiskaútgerð úr havinumk. Higartil eru tikin 1000 tons av ymsari fiskaútgerð upp - umframt 22.000 gørn.

Av limalondunum í Global Ghost Gear Initiative kunnu nevnast Belgia, Kanada, Holland, Nýsæland og Noreg. Føroyar eru ikki limir.

Vit ætlaðu at spyrja landsstýrismannin í umhvørvismálum, Helga Abrahamsen, um ætlanir eru í Føroyum at fara upp í samstarvi ímóti “skuggafiskiskapi” - og á tann hátt tryggja havumhvørvið, men tað eydnaðist okkum ikki.