Jólasøla í Tilhaldinum
Tilhaldið hjá pensjónistunum í Tórshavnar kommunu hevur jólasølu komandi dagarnar. Jólasølan verður opin mikudag 13. til og við fríggjadag 15. november frá kl. 13.00 til 16.00 hesar dagarnar.
Til sølu vera:
Troyggjur, vøttir, húgvur, hosur, turrikløð, nissur, einglar, súltutoy, brendar mandlur, kaffi og te og rísalamande.
Endamál Tilhaldsins er at geva pensjónistum í Tórshavnar kommunu møguleikar at hava ein innihaldsríkan gerandisdag. Eitt fjøltáttað virksemi við fyribyrgjandi og heilsufremjandi tilboðum í hugnaligum umhvørvi. Í kommununi eru fleiri høli, har eldri fólk kunnu hittast til ítriv og prát.
Tað størsta er Tilhaldið í Tórsgøtu, sum læt upp í 1998. Har ber til at spæla kort, fáa undirvísing í teldu, lesa bløð, hoyra fyrilestrar og ymiskt annað.
Undirhús eru í Vágsbotni og á Argjum, har eldri menn hittast til prát og kortspæl.
Millum Bóla í Kollafirði er dagtilhald fyri pensjónistar hvønn mánadag og mikudag kl. 13-18 og fríggjadag kl.10-16.
Eitt dagtilhald er í Nólsoy og er opið týsdag frá kl. 10.30-18 og fríggjadag frá kl. 13-18.
Hugsjónirnar viðvíkjandi Tilhaldunum eru:
At varðveita og menna heilsuna hjá pensjónistum í Tórshavnar kommunu.
Ein stovnur, har hugni, trivni, menning og virðing fyri tí einstaka er í hásæti.
Eitt stað, har øll kenna seg væl, fáa nýtt síni evni og førleikar, læra og hava tað stuttligt.
Skal gera mun fyri lív og heilsu.
Arbeiðið er grundað á meginreglur ST´s viðvíkjandi eldri.
Mál, ið set eru fyri tilhaldini hjá pensjónistunum, eru:
Vit ynskja at veita eina góða tænastu og skapa tryggar karmar soleiðis, at pensjónistar í Tórshavnar kommunu trívast og kunnu gera tað, teimum dáma.
Ongin limaskapur er. Ynskt verður, at øll skulu kenna seg hjartaliga vælkomin.
Mest lisið í farnu viku
Samband
Heygsvegur 8
490 Strendur