Leiðslan í gamla Eik banka dømd at gjalda 150 mill. kr.
Á middegi í dag fall dómur í Føroya Rætti móti leiðsluni í gamla Eik Banka.
Fyrrverandi stjórin, Marner Jacobsen, og fyrrverandi nevndarformenninir, Odd Bjellvåg og Fritleif Olsen, eru dømdir at gjalda 150 milliónir krónur til Fíggjarligt Støðufesti. Fyrrverandi stjórin, Bjarni Olsen, er frídømdur.
Fíggjarligt Støðufesti stevndi í 2012 teir fýra úr fyrrverandi leiðsluni hjá Eik banka og eisini uttanhýsis grannskoðaran, Hans Laksá, eftir 150 milliónum krónum fyri teirra leiklut tá bankin fór á heysin. Ákæran móti Hans Laksá var seinni slept.
Føroya Rættur hevur tikið støðu til fýra ítøkilig mál:
- Valbjørn Dalsgarð, sum bankin misti 88 milliónir uppá.
- Sydporten sum bankin misti 157 milliónir uppá
- FDI, sum er eitt mál um 8 týskar handilsmiðstøðir - har bankin misti 204 milliónir.
- IRE, sum snýr seg um 20 milliónir til eitt týskt íløgufelag og sum Marner Jacobsen einsamallur er stevndur fyri.
Teir dømdu skulu rinda 150 milliónir krónur solidariskt til Fíggjarligt Støðufesti, men millum teir tríggjar innanhýsis skulu Frithleif Olsen, Marner Jacobsen og Odd Bjellevåg rinda ein triðing í part.
Fíggjarligt Støðufesti skal rinda góðar 9 milliónir krónur í sakarmálskostnaði til Bjarna Olsen, sum varð fríkendur.
Úrskurðurin í Føroya Rætti kann kærast til landsrættin. Freistin at kæra er 4 vikur.
Partur av málinum er eisini danski Eik bankin. Í sakarmálinum, sum hevur verið móti danska Eik banka vórðu fýra oddamenn dømdir í landsrættinum at gjalda Fíggjarligum Støðufesti 28,6 mió. kr. - umframt rentu - frá 30. november 2011. Millum teir dømdu í danska Eik var eisini Marner Jacobsen, sum var nevndarformaður í danska bankanum.
Mest lisið í farnu viku
Samband
Heygsvegur 8
490 Strendur