Á heimasíðuni hjá Filmsfelagnum eru nógvir filmar júst avdúkaðir á skránni, komandi mánaðirnar. 

Millum annað heimildarfilmurin "Honningland", ið vann fleiri prísir á Sundance filmfestivalinum í ár. Filmsfelagið skrivar soleiðis um filmin: 

- "Tað er í eini avfólkaðari bygd í Makedonia, at vit møta Hatidze, sum gongur niðan í líðina at hyggja eftir býflugubølinum, hon hevur gjørt har uppi. Meðan hon stillisliga syngur, tekur hon hunangin, uttan at hava so mikið sum vernd fyri andlitið ella handskar á hondunum. Komin oman aftur á slætt, er hon fyrst og fremst um gomlu mammuna, sum liggur í song, og tá stundir eru, fer hon drúgvu ferðina inn í stórbýin, Skopje, at selja hunangin. Men so flytir eitt nomaduhúski til friðfyltu bygdina og alt paradísið fer upp í larm og maskinur við sjey óstýriligum børnum og hálvt annað hundrað neytum. Allíkavæl bjóðar Hatidze teimum vælkomnum í grannahúsið og sigur teimum alt um kynsturin at gera hunang og halda býflugur."

Fleiri filmar eru at finna á heimasíðuni hjá Filmsfelagnum