Sjómanstrúboðarin - 350 skip í eitt ár
Sjómanstrúboðarin byrjaði sum 26 ára gamal í frítíðini at vitja umborð á skipini, sum í dag hevur ment seg til 26 ár í hesi tænastu. Talan er um Sjómanstrúboðaran av Nesi á Toftum, Torleif Johannesen.
Sjómanstrúboðarin hevur bústað á Nesi, og har frá kann hann fylgja við hvussu tað rørist á hansara arbeiðsmarknaði, tí frá Nesi sær hann skipaferðsluna, sum fer oman og niðan eftir Nólsoyarfirði, og tað eru fá skip, sum hann ikki sær. Hallur av Rana, blaðmaður, skrivar í eini samrøðu við Torleif, at “hóast hann er millum sjómenn, er hann ikki ein teirra, men hann er fiskimaðurin millum sjómenn.”
Torleif Johannesen hevur arbeitt á sjómansheimum í Havn, Runavík og á Bornholm, men síðan 1993 hevur hann í 26 ár verið í fulltíðarstarvi innan sjómansmissiónina hjá Føroysku Heimamissiónini. Hann vitjar umleið 350 skip um ári, og tekur man árini á teimum trimum Sjómansheimunum við, kann hugsast, at føroyski Sjómanstrúboðarin í sínum arbeiðsskeiði inntil nú hevur verið í samband við meira enn 100.000 sjómenn – kortini sigur Torleif, “at hann hevur verið væl móttikin allastaðni, har hann er komin!”
Tað var Føroyska Sjómansmissiónin, sum tók stig til at halda Allahalgannadag sum minningardag teirra sjólætnu, og hesin dagurin fyllir tí nógv í tænastuni hjá Torleifi. Hann sigur í samrøðu við Sosialin: “Tað verður flaggað í hálvari stong um alt landi. Minnini eru sterk henda dagin. Tá man hevur arbeitt millum sjómenn í 26 ár, kemur man nær inn á lívið hjá mongum familjum, sum hava mist onkran av sínum kæru á sjónum. Eg havi kent onkrar av monnunum, ið eru farnir.”
Torleif upplýsir annars fyri Sosialinum, at í yvirlitinum hjá Fólkakirkjuni framgongur, at eingin føroyingur er sjólatin seinasta Allahalgannaár.
Torleif sigur, at facebook hevur gjørt Sjómansmissiónina meira sjónliga í almenna rúminum, við tað, at har verður dagliga dagført hvat Sjómanstrúboðarin ger.
Torleif sigur annars, at umborð á fiskiskipum er tað ein andalig undantaksstøða, sum er galdandi, tí har eru eingi samkomumørk.
Kristiliga Tíðindatænastan
v/poul jóhan djurhuus
gjaranes@gmail.com
Mest lisið í farnu viku
Samband
Heygsvegur 8
490 Strendur