Tað má vera beiskur biti hjá fronskum mentanarsnobbum, at Benjamin Griveaux, yndisvalevni hjá sjálvum Macron forseta til næsta borgarstjóra í París, ætlar, at allir parísbúgvar hereftir verða tvímæltir sum 16 ára gamlir.

Griveaux, 41 ár og ráðgevi hjá Macron í fleiri ár, heldur, tað líkist ongum, at fólk í heimsbýnum París tosa so illa enskt, tá tað er so umráðandi at vera fullkønur í enskum máli bæði til arbeiðis og á ferð úti í heimi.

At tryggja øllum børnum málførleika í enskum heldur Griveaux vera góða íløgu í teirra framtíð. Um hann verður valdur borgarstjóri til várs, ætlar Griveaux, at øll børn skulu læra enskt longu í barnagarði. Eisini skulu allir fólkaskúlar fáa eyka frálæru lagda aftrat tímaætlanini, um tað er neyðugt.

The Daily Telegraph skrivar, at ólíkt sínum undanmonnum tosar Macron  ofta enskt við útlendskar leiðarar á fundum og í telefon. Hann er eisini kendur fyri at brúka nógv støk ensk orð, tá hann tosar franskt til arbeiðis og í frítíð.

Tað hevur ikki altíð gingist so væl. Eitt dømi er, at Macron tíðliga í forsetatíðini varð argaður fyri at lova, at Frakland skuldi gerast “une ‘start-up’ nation.”

Frá gamlari tíð hava fraklendingar spottað bretar sum ein tjóð av ‘shop keepers’ og enskt at vera eitt ‘kraddaramál’. Franskar stjórnir hava ført ein harðan málpolitikk, og málnevndir hava reinsað franskt fyri fremmand orð.

Tað hevur ført til, at franskar orðabøkur hava bert 80.000 orð íroknað tey teknisku heitini, meðan enskt mál hevur 85.000 vanlig orð umframt 200.000 teknisk og staðbundin orð, sum øll eru vælkomin til at verða brúkt.

Tað sjáldsama við enskum máli er, at orð við fornenskum uppruna eru stutt, meðan tey ‘fronsku’ lániorðini úr miðøld (mong við latínskum uppruna) hava fleiri stavilsi, eins og fronsk, sponsk, italsk, portugisisk og rumensk.

Ein styrki við enska málinum er, at tað hevur fáar bendingar og endingar, ið ger tað lættari at tosa hjá útlendingum at skilja, læra og tosa einfalt enskt.

Gloym so ikki orðini hjá Otto von Bismarck, ið segði, at “tað, ið fer at ávirka evropiskan og heimspolitikk í 20. øld mest verður, at USA tosar enskt mál.”