Kl.13.00 í dag kom frystilínuskipið Jógvan I, fyrrverandi Atlantic á Toftir. Tað er P/F Eysturoy, við Anfinni Olsen, sum hevur keypt skipið úr Norra. Tað er bygt í 1998, men er í fínasta standi. Bæði høvuðsmotorurin og hjálpimotorarnir eru frá 2018 og øll frystiútgerðin er frá 2012.

Skipið er 44,9 metrar langt og 10,5 metrar breitt og lastar góð 300 tons av frystum fiski.
16 mans vera við Jógvani I og Heri Henriksen verður skipari. 

Nes kommuna skipaði fyri hátíðarhaldinum tá skipið kom. Nes sóknar hornarkestur spældi og borgarstjórin Jóhannus Danielsen tosaði. So sungu mennirnir í Undirhúsinum. Síðani tosaði Anfinn Olsen, og segði millum annað, at skipið kom at eita Jógvan I eftir pápanum, Jógvan Ingvard Olsen. Hann segði eisini at tað í ár vóru 50 ár síðani teir fingu fyrsta línuskipið Stapan, sum var bygdur í Vestmanna. Eftir tað segði Kristmund Johannesen nøkur orð. Øll vóru síðani bjóðaði umborð at hyggja eftir skipinum og at fáa sær suppu og drekka í tjaldinum á bryggjuni. Tað skrivar Føroyska Sjómansmissiónin, sum eisini ynskir eigarunum til lukku og Guds signing við skipinum.

Fleiri myndir eru at síggja á facebook vanganum hjá Føroysku Sjómansmissiónini her.