Nýskapan í ferðavinnuni er skipað sum ein íverksetaradíkjari, á enskum nevnt “startup accelerator programme”. At átakið er skipað sum ein íverksetaradíkjari merkir, at verulig ferð verður sett á menningina av verkætlanunum hetta tíðarskeiðið.

Útvaldu verkætlanirnar fáa sjey skraddaraseymaðar vikur í Hugskotinum við ókeypis ráðgeving frá mentorum úr føroyska vinnulívinum og ókeypis sparring við fremstu serfrøðingarnar innan ferðavinnu. Luttakararnir fáa eisini ókeypis innivist í Hugskotinum alt tíðarskeiðið umframt luttøku á spennandi verkstovum við undirvísing, framløgum og netverkan. Endabresturin á Nýskapan í ferðavinnuni verður á stórum vinnutiltaki í mars 2020, har luttakararnir leggja úrslitini av verkætlanunum fram. Á tiltakinum luttaka m.a. viðkomandi íleggjarar, møguligir samstarvsfelagar og umboð frá føroyska vinnulívinum.

Endamálið er at eggja íverksetum til nýhugsan á ferðavinnuøkinum, at stuðla nýggjum fyritøkum, ið arbeiða við ferðavinnu, og at spjaða ferðavinnuna bæði landafrøðiliga og yvir árið.

Øll, sum hava áhuga í at arbeiða við sínum ferðavinnuhugskoti ella -fyritøku, eru vælkomin at søkja um luttøku á hesum leinki: https://hugskotid.fo/skrseting-nskapan-feravinnuni

Umsóknarfreistin er 6. des 2019 kl. 23.59. Avmarkað pláss.

Tað eru Hugskotið og Visit Tórshavn, sum skipa fyri Nýskapan í ferðavinnuni.