Verkætlanin av hotellinum, sum eftir ætlan skal byggjast mitt í Nuuk, er júst sent til almennar hoyringar.

Hotellið skal standa í sonevnda "Kolonihaven", mitt í grønlendska høvuðsstaðnum. Tað skrivar grønlendska tíðindablaðið Sermitsiaq á heimasíðu teirra. Onki stendur um, nær hotellið verður latið upp.

Marglætishotellið skal fevna um 94 kømur, matstovu, barr og salong, ráðstevnu- og fundarhøli, venjingarhøli og spa.

Tað eru Berjaya Corporation Group of Companies, sum eiga og reka marglætishotell í Asia og økjum við Kyrrahavið, sum stendur fyri verkætlanini.

Borgarstjórin í Nuuk, Charlotte Ludvigsen, gleðist um nýggju hotellverkætlanina. Hon sigur við Sermitsiaq, at "ferðafólkastrategiin hjá okkum er at draga rík ferðafólk til Grønlands, og tað er júst tílík ferðafólk hetta marglætishotellið vendir sær til. Eitt einsamalt hotell merkir ikki, at vit hava rokkið málinum, men tað er eitt stórt fet rætta vegin."

"Hetta er ein altjóða verkætlan í einum viðkvæmum øki. Verkætlanin fer at fáa nógva umrøðu, men virksemið er longu ein partur av kommunuætlanini, og umsitingin metir, at verkætlanin fer at fáa ein jaligan leiklut í økinum og í býnum", stendur í lýsingini, frá Hans Henrik Winther Johannesen, stjóra í umsitingini av virki og umhvørvi.

Nevndirnar, sum umsita búskap og vinnu í Nuuk eru farnar upp í part við umsitingini fyri virki og umhvørvi, og ynskja sostatt at verkætlanin verður veruleiki.

Tað skrivar Standby Danmark.

Men ikki øll eru fegin um ætlaða marglætishotellið. Uppá minni enn eitt døgn hava ikki færri enn 500 borgarar skrivað undir eitt skriv, sum mótmælir ætlanunum at byggja hotell í fýra hæddum í eina endanum av Kolonihaven í Nuuk.