Vitjandi fara skjótt at skula gjalda fyri at sleppa at vitja eina av vakrastu strondunum í Sardinia, nú myndugleikar á staðnum royna at mika um skaðan, sum er staðin av ovfólkan á strondini.

La Pelosa, sum er ein hvít strond í Stintino, norðalaga í Sardinia, hevur verið lýst sum ein lítil partur av himmalinum á jørð, lokkar hvørt summar túsundtals vitjandi. Men umhvørviskanningar vísa, at stóra talið av vitjandi á strondini er ein hóttan móti vistskipanini. Tað hevur fingið borgarstjóran í Stintino, Antonio Diana, at seta eina gjaldsskipan í verk og at seta eitt evstamark, soleiðis at í mesta lagi 1.500 sleppa at vitja strondina frá næsta summar og frameftir. 

Antonio Diana greiddi á borgarafundi í november frá, at talan í fyrstu atløgu er um eina royndarverkætlan. "peningurin, sum kemur inn av atgongumerkjunum, skal vera ein hjálp at gjalda fyri umsjón og viðlíkahaldið av strondini". 

Í forvegin er tað vorðið bannað at roykja á strondinini, og tað er eisini forboði at selja nakað. Somuleiðis eru handkløð og taskur bannaðar, tí fólk kunnu ótilvitað taka sand av staðnum. Rán av sandi og skeljum á strondunum á Sardinia er ein stórur trupulleiki. Brotsfólk kunnu fáa bøtur upp í 3.000 evrur - ella nærum 23.000 danskar krónur.

Onnur væl dámd ferðamál í Italia eru eisini farin at krevja pening, fyri at minka um nógvu vitjaninar. Millum annað í Venesia (Venedig), fara myndugleikar at krevja gjald frá ferðandi frá juli 2020. Civita di Bagnoregio, sum er ein miðaldarbýlingur millum Lazio og Umbria, byrjaðu við atgongumerkjasølu í 2013, og har skal átakið hava verið rættiliga væl eydnað.