Dagin fyri, at Frans pávi umsíður reiv kápuna av Fernando Karadima, bispi í Santiago í Kili, sendi kilenska katólska kirkjan eina vegleiðing út á I-netið til landsins klerkar á øllum stigum um, hvussu teir kundu og ikki máttu vísa sína umsorgan fyri dreingjum og gentum í teirra varðveitslu á katólskum skúlum.

Tá hevði pávin hildið hondina yvir hesum ‘barnkáta’ Karadima, til mótmælini hoyrdust heilt til Vatikanið, so sjálvt Frans boygdi seg og gav honum sekkin.

Vegleiðingin til klerkarar á netsíðuni hjá erkibispinum í Santiago er herskin kostur at lesa. Prestar eiga ikki at nema kynslutirnar hjá børnum, ikki klappa tey á afturpartin og ikki klemma tey aftanífrá sum tekin um umsorgan og vinsemi. Prestum varð eisini álagt ikki at kyssa børn beint á munnin.

Sjálvur Ricardo Ezzati kardinalur í Santiago skrivaði undir vegleiðingina.

Pávin hevur annars úr at gera við at prædika ímóti kapitalismu (hóast hon føðir, klæðir og hýsur 100-tals miljónum av katolikkum í heimsins fátæku londum (fátæk, tí katolisisman ikki sum protestantisman skapar virði).

Pontifurin í Róm hatar eisini kol, olju og gass, hóast júst kolvetni tryggjar 85% av allari heimsins orku til framleiðslu og flutning á landi, sjógvi og luftini.

Ná, men aftur til Kili og ovastu klerkar í høvuðstaðnum Santiago: Tann dreingjaglaði klerkurin, Fernando Karadima, hevði ikki meiri enn fingið sekkin (forrestin bert fáar mánaðir eftir, at erkibispurin í Sangiago mátti skiftast út av somu pedofilu grund), so bleiv vegleiðingin hjá Ricardo Ezzati kardinali um rættan og skeivan atburð móti smádreingjum í katólsku kirkjuni tikin aftur av I-netinum og heimasíðuni hjá katólsku kirkjuni.

Sjálvt Frans pávi helt alla vegleiðingina vera eina gølu, tí hon lýsti út í æsir allar teir óvanar, ið Pávakirkjan kring heimin hevur noyðst at rinda miljardir í endurgjaldi og skaðabótum fyri til fólki, ið kirkjan hevur misbrúkt sum børn.

Syndarligt, at 100-tals miljónir av kristnum og trúgvandi katólskum hampafólki av skomm eru givin at ganga til messu og í kirkju, ikki longur vilja gjalda til kirkjuna og nú halda seg burt frá at praktisera sítt kristni.

Heiminum tørvar í dag hvønn einasta kristnan mann og kvinnu til at standa ímóti áganginum frá avkristnan, islam o. ø. av kristindómsins fíggindum.