Í desember fingu børnini, sum eru í aldrinum 0 til 3 ár, eitt myndaspæl og ein sangposa, har lagt er upp til, at starvsfólkini velja nakrar sangir og somuleiðis knýta nakrar ítøkiligar lutir, sum mynda jólasangirnar.

Jórun Niclasen, námsfrøðiligur ráðgevi, sigur, at við at víðka sangløtuna við myndum, so verða fatanarevnini hjá børnunum stimbra. Harumframt verður orðatilfeingið økt, og børnini læra at hugsavna seg. Jórun leggur afturat, at hóast fleiri av børnunum ikki hava so nógv orð, so er hetta ein góður máti at nýta sangin, sum grundarlag fyri einari samrøðu, tí við at syngja somu sangir dagliga, so læra børnini skjótt sangirnar.

Í vikuni hittu vit nøkur fitt børn í Dr. Margrethu, sum vóru ógvuliga fegin fyri myndaspælið. Tey eldru børnini høvdu longu lært seg fleiri orð, sum mynda jólahøgtíðina, og smærru børnini vóru sera røsk at síggja røttu myndirnar á myndaplátuni.