Kundar í BankNordik fáa negativa innlánsrentu
BankNordik tekur nú somu avgerð sum fleiri danskir peningastovnar hava tikið: Kundar fáa nú negativa innlánsrentu.
Í tíðindaskrivi sigur BankNordik m.a.:
”Higartil hava privatkundar verið undantiknir negativari rentu, og vit høvdu vónað, at tað ikki fór at gerast neyðugt at seta negativa rentu á privat innlán.
Útlit eru tó ikki fyri, at rentustøðið fer at hækka fyribils, og tí hava vit tikið avgerð um at tillaga okkara rentur, so tær í størri mun samsvara við marknaðargongdina.
Sostatt lækkar rentan á bústaðarlánum við 0,2 prosent-stigum, soleiðis at lægsta bústaðarrenta verður 2,75 % pro-anno.
Fyri privatkundar verður negativ innlánsrenta sett á upphæddir omanfyri 500.000 kr., og eisini á pensjónskontur.
Hóast tað ikki er hugaligt at lækka innlánsrentuna fyri privatkundar, so er hetta ein neyðug avgerð, ið skal fyribyrgja, at vit tapa pening”, sigur Árni Ellefsen, forstjóri í BankNordik.
Børn og ung undir 29 ár verða undantikin negativum rentum og fáa í staðin 0,00 % pro-anno í rentu á øllum innlánskontum og pensjónskontum.
Mest lisið í farnu viku
Samband
Heygsvegur 8
490 Strendur