Danmark: átta fólk ákærd eftir álvarsligastu greinini um yvirgang
Í stóra løgregluátakinum, sum fór fram fleiri staðni í Danmark í gjár, vórðu 20 fólk handtikin fyri at hava ætlanir um yvirgang. Í dag eru átta av teimum ákærd eftir harðastu greinini, sum snýr seg um yvirgang.
Tey ákærdu eru tvær kvinnur og seks menn. Sjey av teimum eru millum 21 og 28 ár, meðan eina kvinnan er 38 ár.
Tvær sundurskildar grundlógarhoyringar av teimum átta fólkunum byrjaðu fyrrapartin í dag.
Í teirri einu grundlógarhoyringini eru trý fólk - tveir menn og ein kvinna - ákærd fyri at fyrireika eina bumbuspreinging annaðhvørt í Danmark ella uttanfyri Danmark. Tey trý hava eftir øllum at døma roynt at fingið fatur á spreingievninum TATP. TATP er sera viðbrekið spreingievni, sum er kent frá øðrum bumbuatsóknum - millum annað varð tað nýtt í bumbuspreingingini í London í 2005.
Í hinari grundlógarhoyringini eru fýra menn og ein kvinna ákærd fyri at hava roynt at keypt ella fíggjað vápn, ljóðdoyvara og annað til yvirgang.
Talan er um grein 114, stk. 1 í donsku revsilógini, og sambært henni kann avleiðingin hjá hesum átta gerast lívlong fongsulsrevsing.
Hini 12 fólkini, sum eisini vórðu handtikin í átakinum í gjár, verða eftir øllum at døma leyslatin.
Tað skriva Politiken og Danmarks Radio í dag.
Mest lisið í farnu viku
Samband
Heygsvegur 8
490 Strendur