Professari á DTU: Ætlanin er at fólk skulu hava elektroniska flís í heilan
Ímynda tær at tú hevur eina elektroniska flís, eitt chipp, í heilanum, sum ger, at tú kann samskifta við onnur umvegis at hugsa, og leita á internetinum uttan telefon ella knappaborð.
Langtíðarætlanin hjá felagnum “Neuralink”, sum Elon Musk eigur, er at skapa samband millum heilan hjá fólki og digitala heimin við eini elektroniskari flís, sum skal skurðviðgerðast inn í heilan. Tað skrivar videnskab.dk.
Tað er tó ikki einans Elon Musk, sum er mest kendur fyri framleiðsluna av Tesla bilum, sum hevur hesa ætlan, ið á enskum verður kalla brain-machine-interface. Í eini nýggjari frágreiðing frá Ráðnum hjá evropisku felagsskapunum verða 100 nýskapandi komandi gjøgnumbrot viðgjørd og teirra millum er eisini flísin í heilanum. Í Danmark er eisini stórur áhugi í hesi menning.
Lars Kai Hansen, professari á DTU Compute, vísir á, at við eini slíkari flís fer at bera til at máta tað sum hendur í heilanum og tað kann hava positiva ávirkan á heilsuviðgerð. Men, sambært videnskab.dk, eru eisini aðrar ætlanir við hesi flísuni í heilanum enn at gera mátingar.
Elon Musk hevur víst á, at hansara dreymur er at skapa eina symbiosu millum menniskja og maskinuna. Hetta skal tryggja at menniskja klárar at fylgja við, tá eftirgjørt telduvit (AI) fer at verða meria vanligt í framtíðini.
Sambært Lars Kai Hansen, professara, vóna granskarar at eitt elektroniskt tól í heilanum fer at gera at fólk kunnu samskifta skjótari við teldur og við hvønn annan. Enn eru ongar royndir gjørdar við at at seta flísar í heilar, men sambært ástøði skuldi tað borið til, sigur Lars Kai Hansen.
Royndir eru tó gjørdar við at seta elektroniskar flísar í rottur. Og hesar royndir vístu, at rotturnar kundu samskifta umvegis tankar hóast stór frástøða var millum rotturnar.
Tá tað kemur til trygdina við at hava eina flís í heilanum, sigur professarin á DTU m.a., at tað er sera týdningarmikið at tryggja at data ikki verður deild uttan at einstaklingurin hevur givið loyvi.
Væntað verður at Neuralink byrjar sínar fyrstu royndir við elektroniskum flísum longu í 2021, skrivar Videnskap.dk.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur