Ein arbeiðsbólkur undir leiðslu av Bjarna á Steig handaði í gjár landsstýrismanninum í heilsumálum, Kaj Leo Holm Johannesen eitt tilmæli um palliatión í Føroyum.

Høvuðsniðurstøðan hjá arbeiðsbólkinum er, at palliatión skal skipast í eini landsfevnandi tænastu, staðsett í Dronning Alexandrines Hospital á Landssjúkrahúsinum, har kommunulæknarnir og heimatænastan hava ein týdningarmiklan samskipandi leiklut í primera heilsugeiranum. Tað skrivar Landssjúkrahúsið á Facebook.

Kaj Leo Holm Johannesen segði, at hann var samdur við arbeiðsbólkinum í, at Dronning Alexandrines Hospital er eitt upplagt stað til palliativa deild. Landsstýrismaðurin segði á fundinum, at hann fer at gera alt fyri at menna palliativa økið, og væntar at skjøtil kann setast á arbeiðið í 2020.

Um arbeiðið
Arbeiðsbólkurin varð mannaður við fakkunnleika, serkønum fólki innan áhugabólkar og umboðum fyri Heilsumálaráðið. Arbeiðssetningurin, sum bólkurin fekk at arbeiða út frá, var m.a. at lýsa núverandi støðu á økinum og gera eitt tilmæli um, hvussu palliatión og hospise frameftir kundi verða skipað í Føroyum, skrivar Landssjúkrahúsið.