Í Degi & viku fyrr í desember segði Hanus Hansen, reiðari og stjóri í JFK-samtakinum, at hollendsku samstarvsfelagar hansara (P.P. í Hollandi) vunnu "lítlar og ongar pengar" uppá fiskiveiðu í Føroyum. Hetta kemur borgarstjórin í Vagi, Dennis Holm, við einum aftursvari uppá á sosiala miðlinum Facebook:

"Eg trúgvi ikki, at útlendskar fyritøkur eru í Føroyum orsaka av vælgerandi endamálum - tað vænti eg ikki nakar hugsar yvirhøvur, so har mugu eini 99,9% av føroyingum verða nokk so samd.

Um hugt verður eftir yvirlitinum í Degi & viku yvir hollendskan eigaraskap í føroyskum reiðaríum og fiskiskipum - og hugt verður at hvussu nógv hesi skip fiskaðu fyri í 2018, so er greitt, at hollendskur eigaraskapur er uppí umleið 19% av samlaða avreiðingarvirðinum í 2018 (og hetta eru bara skipini, sum Hanus Hansen eigur saman við hollendsku P.P. - og ikki onnur føroysk reiðarí, sum hava útlendskan eigaraskap).

Í 2018 var samlaða avreiðingarvirði hjá føroyskum skipum sambært VØRN: 3.155.749.911 kr. (góðar 3,16 milliardir krónur) av hesum fiskaðu skip, sum hollendsku P.P. eiga í, fyri umleið 595 mió. kr., svarandi til umleið 19%. Sí eisini yvirlitið niðanfyri.

Sjálvandi vinna hollendsku P.P. so ella so pengar við at verða partur av føroysku fiskiveiðuni.

Spurningurin er so, um føroyingar ikki sjálvir høvdu megnað at fiska hendan fiskin, fingið hesa veiðuna til hølvdar, uttan útlendska uppíblanding.

Summi meta útlendingar hava stóran týdning. Men øllum er greitt, at útlendingar eru ikki her orsaka av vælgerandi endamálum í Føroyum!"