Er Grikkaland á veg aftur á beint
Eingin torir at taka nakað fyri givið, tí allir grikskir flokkar kappaðust um at koyra heimsins elska fólkastýri út av bakkatromini tey 10 árini fram til 2008.
Men í summar vann grikski konservativi flokkurin, Nýtt Demokrati, valið til tjóðartingið í Athen við 40% av atkvøðunum, 158 (altso meirilutan) av 300 tjóðartingslimum og skipaði eina høgrastjórn, skrivaðu m.o. Le Monde í París.
Leiðari er Kyriakos Mitsotakis, væl kent navn í grikskum politikki, tí pápin var eisini konservativur floksformaður. Tann, ið leiddi flokkin ímillum báðar feðgarnar, æt Nikos Kinstandaras, oyðslutur við almennum peningi og samsekur í, at lítla landið (bert 11 mió fólk) í landsynnings-Evropa fór um koll.
Stjórnarflokkurin farnu 4 árini, tann hálvkommunistiski Syriza við Alexis Tsipras, mátti lata sær lynda bert 86 tingsessir, tó nóg mikið til at verða ein sterk andstøða, heldur Tagesspiel í Berlin. Fasistiski flokkurin Gyltur morgun, fekk ongan tingmann valdan og hvarv úr grikskum politikki fyribils.
Tagesspiel metir, at Tsipras bleiv ov ræðin móti endanum, lurtaði ikki eftir sínum grasrótum og boygdi seg fyri ES-krøvum um at spara og tátta, hóast hann vann valið við at lova at biðja ES renna og hoppa.
Men hóast alt kláraði fyrra stjórnin at minka arbeiðsloysið úr 28% niður í 18%.
Nýggi konservativi forsætisráðharrin loysti straks bondini við at lætta skattin, so arbeiðshugurin øktist, og nýtt fíggjarfrælsi skapar nýggj og størri virði í grikska búskapinum. ‘Fløðandi sjógvur flotar allar bátar’.
Grikkar vóru skammleysir undan kreppuni. Skattamoralurin var í botni, fólk og fyritøkur læntu pening uttan fyrilit, og hitt almenna gekk undan í ábyrgdarloysi. Úrslitið var, at ES mátti loysa Grikkaland úr botnleysari skuld og húsagangi við ovurhonds lánum, sum vórðu endurnýggjað við harðari treytum 2 ferðir.
Kinverjar og turkar hava keypt 100-túsundtals ognir um alt Grikkaland, mest í Athen. Grikkaland hevur tikið flestar innbrótarar úr Miðeystri og Afrika, tey flestu send víðari upp í Evropa, men flóttalegur, ringast á oynni Lesbos, har ferðavinnan doyði, hava gjørt lívið hjá meinigum grikkum eina 4 ára marru.
Meðan landastrok úr 3-heimslondum tustu inn, flýddu 100-túsundtals grikkar heimanífrá, mest til Norður- og Vesturevropa. Um tey koma aftur, er óvist.
Mest lisið í farnu viku
Samband
Heygsvegur 8
490 Strendur