Svar til stuðulsbólk um dansistovuna í Sørvági
Tá ið ein stuðulsbólkur heitir á fólk um at taka støðu til eitthvørt, er skilabest, at málið til støðutakanina er rætt lýst. Tí verður hendan rættleiðing gjørd – uttan persónligar viðmerkingar um, hvat er best at gera framyvir.
Preben Hansen, verkfrøðingur, varð biðin um at kanna dansistovuna, so greiða fekst á, hvørjum standi hon er í.
Kanningin var gjørd í juni mánað í ár. Tað kann vera, at kanningarúrslitið er torskilt, men í stuttum kann sigast, at niðurstøðan av kanningini sigur okkum, hvat virði er í bygninginum, um hann skal setast í stand, og hvussu nógv tað fer at kosta at gera tær mest neyðugu umvælingarnar.
Stuðulsbólkurin sigur soleiðis í áheitanini á Sørvágs kommunu:
- At “rapportin fortaldi okkum eisini, at tað kostar 3 milliónir at fáa dansistovuna í brúkiligan stand, og fyri 6 milliónir fáa vit ein bygning í sera góðum standi.”
- “Rapportin ....... sigur, at tað kostar 650.000 at taka hana niður.”
Hetta er ikki heilt rætt. Tølini eru blandaði skeivt.
Samanumtikið og í stuttum sigur kanningin okkum, at konstruktiónin í bygninginum í ein mun er brúkilig til eina møguliga endurbygging - betongveggir og partar av takgerðini eru verd at varðveita (bevaringsværdige med visse udbedringer). Tá ið skaddir og eldhættisligir bygningslutir eru tiknir niður/burtur fyri ein kostnað upp á kr. 650.000,- hava eftirverandi betongveggir, takkonstruktión, gólv og aðrir bygningslutir eitt restvirði upp á kr. 3. mió.
Síðani metir verkfrøðingurin, at fyri ein kostnað upp á kr. 6 mió. kann bygningurin umvælast til dagsins standard. Tá tað er gjørt, hava vit fingið akkurát sama ‘byggilistarliga’ bygningin til somu funktiónir, sum hann hevur verið brúktur til áður, men við m.a. nýggjum taki, vindeygum, hurðum og klædningi – ein óbroyttan, men tó umvældan bygning.
Hetta eru so hansara metingar: Ein slík endurbygging hevði kostað 650 túsund fyri niðurtøku av skaddum og eldfimum tilfari + 6 mió. kr. fyri umvælingina. Vórðu onnur serkøn spurd, fingu vit helst aðrar metingar eisini.
Leggjast kann afturat, at sambært síðstu royndunum, kommunan hevur við at umvæla bygningar, so fara 6 mió. ikki at røkka til. Helst skal umleið helvtin av 6 mió. leggjast afturat!
Eftir bestu sannføring verður úrslitið av kanningini, ið gjørd er, lisið soleiðis.
Gott nýggjár!
Sørvágs kommuna
Aimé Jacobsen, borgarstjóri
Kanningarúrslitið sæst her https://www.sorvag.fo/files/dansistova_tilstandsvurdering.pdf
Mest lisið í farnu viku
Samband
Heygsvegur 8
490 Strendur