Tað eru Jens Mortansson Jelstrup Nolsøe, Yngve Stenstrøm og fyritøkan Ard Innovation, sum standa fyri verkætlanini. 

Granskararnir, sum eru knýttir at Norska umhvørvis- og lívfrøðiliga universitetinum í Oslo, hava við verkætlanini skapt nýggjar sambindingar, sum kunnu brúkast í staðin fyri eitrandi plantuverjuevni.

Eplaálur ger bløðrur, sum kunnu liggja hvílandi í moldini í upp til 32 ár og bíða eftir eini eplavertsplantu. Tað vil siga, at um PCN verður staðfest, so skal økið leggjast brakk fyri eplaframleiðslu í 40 ár.

Nýggju sambindingarnar lumpa PCN bløðrurnar at klekjast á nattúrligan hátt. Tá eingin eplavertsplanta er tøk, doyr nýklakti eplaálurin av svongd - uttan at hava fullført sína lívsringrás.

Sambindingarnar geva eplaframleiðarum møguleikan at basa eplaáli alt árið og at stytta um brakkleggingartíðina frá 40 til bara 2 ár í mold, har PCN er staðfest. Evnið hjá granskarunum er fyrsti umhvørvisvinarligi viðgerðarmøguleikin móti eplaáli í staðin fyri evnafrøðilig týningarevni.

Mett verður, at PCN hevur við sær ein árligan miss í alheims eplaframleiðsluni uppá 10%, svarandi til á leið 30 milliónir tons av eplum árliga.

Eplaálur hevur eisini verið í Føroyum í mong ár. Millum annað varð ein grein um eplaál at finna í fyrsta Fróðskaparritinum frá 1952, sum Hans Jacob Jacobsen - eisini kendur sum Heðin Brú - búnaðarfrøðingur, skrivaði.