Meira um Nólsoyar-Páll
Eftir áheitan høvdu í gjár eina gamla grein hjá Archibald Black, sum var eitt svar til Rolf Guttesen, um bók hansara, um Nólsoyar Páll. Rolf svaraði tá aftur soleiðis.
Meira um Nólsoyar-Páll
Archibald Black hevur í Sosialinum 11. december ( 2019 red ) skrivað nakrar viðmerkingar til bók mína um Nólsoyar Páll, sum bleiv framløgd alment tann 4. december. ( 2019 red ) Black sigur seg hava lisið bókina, og at hann ”er ósamdur í fleiri niðurstøðum.”
Men tíverri byggja viðmerkingarnar hjá Black ikki á sjálva bókina, men á eina útvarpssamrøðu, sum bleiv send beinleiðis (í Nón), og á eina telefonsamsøðu við Sosialin. Um eg í hesum samrøðum av misgávum kanska eri komin at málbera meg skeivt, og siga at Marin Malena, kona Nólsoyar-Pálls, kom úr Uppistovu, og ikki – sum rætt skal vera – úr Norðistovu í Gerðum, so biði eg um umbering.
Men um Black hevði lisið sjálva bókina, sum hann sigur seg hava gjørt, so hevði hann sæð, at har veður við kelduávísing sagt (kapittul 4, síðu 102): ”Páll var einkjumaður, tá hann kom í Gerðar at fríggja til Marin Malenu í Norðistovu.”
Black sigur í stubbanum, at eg skal hava sagt, at ”.Hvør setningur er dokumenteraður og kann eftirkannast.” Tað havi eg ikki sagt (tí tað er praktiskt ógjørligt). Eg sigi (á bakpermuni), at allar útsagnir eru dokumenteraðar við kelduávísingum, og har eru 856 av slagnum. Framvegis á síðu 17 er at lesa: ”Eitt høvuðsmál við bókini er, at alt, sum verður lagt fram og sagt, skal dokumenterast.” Og tað havi eg eftir førimuni gjørt.
Best hevði verið, um Black hevði gjørt viðmerkingar til sjálva bókina, og ikki til umtalu í miðlunum. Men, eg sigi takk fyri viðmerkingar, og framhaldandi góðan lesihug.
Vinarliga - Rolf Guttesen
Greinin stóð í miðlunum 18-12-2019
Mest lisið í farnu viku
Samband
Heygsvegur 8
490 Strendur