Umframt tónleik frá Verdi, Puccini, Faure, Wagner, Carl Nielsen o.ø, so hevur Føroya Symfoniorkestur í ár tvey føroysk verk á skránni til Nýggjárskonsertina. 

Atli Petersen hevur skrivað eina Fanfaru, sum eitur Klovin Klettur, og Ísak N. Jacobsen hevur skrivað ein Tango, hann kallar "Tango vónir". Ísak sigur, at tá ið hann og konan byrjaður at dansa Tango, fann hann út av, at hetta ikki var so lætt, sum hann helt. Hann kallaði tí lagið ”Tango vónir”, tí hann hevur góðar vónir um, at tað verður framgongd í Tangodansinum hjá honum og konuni. Tað skrivar symfoniorkestrið á sosiala miðlinum Facebook.

Á Nýggjárskonsertini luttaka eisini Kór Føroya Symfoniorkesturs og góðir sangsolistar. Í ár er vitjanin úr Mariinsky Operahøllini í St. Patursborg, Yekaterina Solovyova, sopran og Sergei Semishkur, tenor, skrivar Føroya Symfoniorkestur.

Útselda Nýggjárskonsertin er í kvøld og í annaðkvøld kl. 19 í Norðurlandahúsinum.