Fríggjadagin fingu umleið 40 fólk á kryvjivirkinum hjá Bakkafrost í Vági uppsagnarbræv heim við, tá tey fóru í vikuskifti. Í uppsagnarbrævinum stóð, at fólkini vóru uppsøgd við 7 daga freist til tann 21. Januar, ella so longi laksur var at arbeiða. Í skrivinum stóð eisini, at onki virksemi bleiv á kryvivirkinum í Vági aftur fyrr enn í summar. Hetta skrivar Suðuroyarportalurin. 

Starvsfólk á kryvjivirkinum hjá Bakkafrost, sum Suðuroyarportalurin hevur tosað við, siga seg hava vænta, at ein steðgur á 2 mánaðir fór at verða í vár, men at steðgurin fór at verða í eitt hálvt ár, kemur sum ein skelkur fyri starvfólkini.

Bakkafrost hevur havt nógvan laks á Hovsfirði, sum starvsfólk á kryvjivirkinum væntaðu fór at koma til Vágs, men seinastu vikurnar hevur Hans á Bakka verið á Hovsfirði eftir laksi, sum er fluttur norðureftir til virkingar, skrivar Suðuroyarportalurin.

Georg F. Hansen, formaður í Føroya Arbeiðarafelag, finnist eisini at leistinum hjá Bakkafrost tá fólk verða søgd úr starvi. Hann sigur seg m.a. sakna, at Bakkafrost vísir eitt sindur meir samfelagssinni, serliga tí Bakkafrost hevur ráð til tess. 

Les meira her.