Funnu nógv kokain í havnini í Århus
Donsku myndugleikarnir funnu miðskeiðis í desember 40 kilo av kokaini, sum var goymt í einari bingju í havnini í Århus. Løgverjan metir, at virðið á kokaininum hevði eitt tvey- ella trísiffrað milliónavirði, um tað varð selt á gøtuni.
- Altjóða samstarvsfólk okkara gjørdu, at vit tóku eina ávísa bingju út at kanna nærri. Annars byggja okkara toll-kanningar á stak-royndir, gjølligar váðametingar og yvirvaking alt samdøgrið. Í samstarvi við løgverjuna hava vit kikaran settan á fleiri sløg av rúsandi evnum, ikki minst kokain.
Tað sigur tollstjórin í Tollstýrinum, Preben Buchholtz.
Sambært Bucholtz er talan um størstu nøgdina av kokaini, sum hald er lagt á seinastu árini.
Síðan kokainið varð funnið í desember, hevur danska løgverjan verið í tøttum sambandi við altjóða løgverjuna.
Maritime Danmark skrivar, at alt bendir á, at kokainið skuldi í land í havnini í Hamburg, og meiningin hevur ongantíð verið, at tað skuldi enda í Århus. Men Brian Olsen, politiinspektørur, er fegin um, at tað eydnaðist at forða fyri, at kokainið endaði á gøtuni.
Mest lisið í farnu viku
Samband
Heygsvegur 8
490 Strendur