Johan Dahl spyr um útisiglarar og eftirlønarskipan
Johan Dahl, løgtingsmaður fyri Sambandsflokkin, hevur í dag sett Jørgeni Niclasen, landsstýrismanni í fíggjarmálum, ein skrivligan fyrispurning um útisiglarar og eftirlønarskipan.
Fyrispurningurin er soljóðandi:
1. Hvussu langt áleiðis er arbeiðið komið at broyta føroysku eftirlønarlógina, kunngerð til eftirlønarlógina ella dagføra norðurlendska sáttmálan, soleiðis at føroyskir útisiglarar sleppa undan at gjalda eftirløn til tvær eftirlønarskipanir?
2. Og nær kann væntast ein loysn, so at greiða fæst á hesum málinum?
Í viðmerkingunum til skrivliga fyrispurningin sigur Johan Dahl, løgtingsmaður, millum annað, at útisiglarar við bústaði í Føroyum og starvi uttanlands, í løtuni gjalda eftirløn til tvær eftirlønarskipanir, eina í Føroyum og t.d. eina í Norra. Tað gera teir, tí TAKS krevur eftirlønargjald av B-inntøku.
Tey, ið sigla undir DIS, Dansku internationala skipayvirlitinum, ella hava líknandi eftirlønarskipan sum í DIS, kunnu søkja um frítøku fyri inngjaldi til føroysku eftirlønarskipanina í eftirlønarlógini við tilhoyrandi kunngerð.
Hinvegin, siglur tú við norskum skipi ella arbeiðir í Norra, rindar tú til Folketrygd og vinnur tær harvið rætt til aldurspensjón har. Sambært eftirlønarlógini kanst tú ikki fáa frítøku. Johan Dahl metir, at tað ikki ber til hjá fólki í hesi støðu at lúka sera neyvu treytirnar í eftirlønarlógini. Tað ber heldur ikki til at fáa frítøku sambært norðurlendsku konventiónini um sosiala trygging, tí føroyska eftirlønarlógin er ikki umfatað av konventiónini.
- Henda ógreiða støða á eftirlønarøkinum fyri føroyingar í starvi uttanlands er ikki nøktandi við vantandi avgerð frá myndugleikunum, sigur Johan Dahl, løgtingsmaður fyri Sambandsflokkin at enda.
Mest lisið í farnu viku
Samband
Heygsvegur 8
490 Strendur