Hugsi onkuntíð um hesa kvæðareglu, tá SV vísir myndir av 1000-tals ungum fólkum og børnum (onkur eldri øðrvitisfiskur er ímillum), ið undir veitrandi ælabogafløggum sum í eini religiøsari ekstasu koma í skrúðgongu oman í býin. Skjótt yvirtaka tey ólavsøkuna og skrúðgonguna úr løgtinginum í Havnar kirkju og niðanaftur og gera tjóðarhøgtíðina til ein LGBT-festival. 

Vit hava líknandi erstatningsreligiøsar skrúðgongur, tá ‘bimmilimmarar’ fara kravgongu fyri onkrum veðurlagsgudi, eitt nú Gretu Thunberg.

Ná, men til sakina: Mangur hevur hugsað, at hesi LGBT-fólkini kunnu ikki vera so nógv í tali, sum tey halda gang til. Har munu vera onnur, ið larma við. Tað er eisini fínt, tí vit hava jú øll ymisk hjartamál, ið vit stuðla so ella so.

Sá herfyri eina amerikanska universitetskanning, ið kortlegði kynsstøðuna hjá teimum ungu lesandi. 98% vóru hinskynd, søgdu tey, og bert 2% vóru øðrvísi kynd so ella so. Kynini teljast nú annars í yvir 60 variantum yvir sama tema.

Í Bretlandi stendur eftir øllum at døma betur til hjá LGBT-partinum av fólkinum. Har eru væl fleiri, ið hava kynsliga serstøðu. Tað kann eisini vera, tí at bretar í øllum aldrum og sosialum løgum eru meiri margfeld og ‘kinky’, sum tað verður kallað á enskum, enn ímillum ungar amerikanskar studentar, ið kappast um at skora makar, ið eru á leið upp á sosiala rangstiganum.

Bretska The Guardian kunngjørdi herfyri eina vísindaliga kanning, ið vísti, at av teim spurdu bretunum svaraðu eisini 2%, at tey eru samkynd ella tvíkynd. 

4,1% vildu ikki svara ella søgdu seg ikki vita, hvat kyn tey eru. 

Heili 93,2% søgdu, at tey eru ‘straight’, vanlig hinskynd. Bert 0,4% søgdu seg vera ‘annað’. (Bert hugflogið ger mørk, tá um hetta brandaktuella evni ræður). 

Tá tað er sagt, má leggjast aftrat, at málið hjá LGBT og tað tí politiskt korrekta er at siga, at einki er longur ‘straight’ ella vanligt. Nú ræður alt um, at tey 93% skulu tvingast til at góðkenna kynsskifti heilt niður til smábørn, og at øll kunnu krevja at verða kallað hvat grammatiskt fornavn, teimum lystir.