Felagsskapurin Offur fyri Kommunismu rópar varskó, at meiningakanningar vísa, at mong ung fólk í Vestanlondum eru so kúheiðin um søgu og samfelag, at upp til 70% siga seg umhugsa at atkvøða sosialistiskt, enntá í USA.

Walt Williams prof á Mason Univ vísir á 2019 útgávu av ‘Economic Freedom of the World’ hjá Fraser Instit og Heritage Foundation, hvussu neyvt persónlig inntøka og búskaparligt frælsi eru tengd hvørt at øðrum. Fjøld av framúr serfrøðingum og fleiri lærustovnar hava samstarvað til felags og røtt vísitøl.

Hong Kong og Singapore eru sum vant ovast í búskaparligum frælsi, hóast nevin hjá Kommunistkina hóttir við at sláa Hong Kong í gólvið. Onnur av heimsins 20 fríastu londum eru Ný Sæland, Sveis, USA, Bretland, Írland, Kanada, Australia, Mauritius, fleiri Norður- og ES-lond.

USA var fallið niður á nr. 16, tá Obama gavst, men síðan Trump loysti skap-andi orkuna í amerikanskum búskapi og fólki, er USA nú aftur á 5. plássi.

Hagtølini, ið ganga inn í vísitølini hjá Fraser og Heritage, umfata tað mesta, ið gevur fólkinum í 162 av heimsins londum (ó)frælsi at virka búskaparliga. Hesir faktorar eru m.a. regluverk fyri vinnuna, skattatrýst,lógar og rættartrygd, handilsfrælsi, stødd á almennum geira og persónligur ognarrættur.

-Har fólk eru frí til at fylgja egnum møguleikum og fríum valum, liva hesi fólk betur, longri og eydnusamari, sigur Fred Mc Mahon, prof á Fraser Institute. 

Sjón gongur fyri søgn:  Miðal ársinntøkan í teimum fríastu 25 londunum var 240.000 kr í 2017. Í teimum 25 fátækastu var miðal inntøkan 40.000, t.e. 1/6. Í teimum fríastu 25 londunum livdu bert 1,8% í fátækradømi, í teimum 25 fátækastu livdu 27% í fátækradømi.

Fleiri Vestanlond eru bæði ófræls og illa fyri. Eitt nú er Italia nr. 46 í fríheit, Frakland nr. 50, Mexico 76, Rusland nr. 85, Kina nr. 113 og  Brazil. nr 150.

Millum lond við minst frælsi eru lond sum Venezuela (av berari sosialismu), Argentina (9. størsta búskap í 1920-árunum), Ukraina (av siðspillu) og nærum øll tey afrikansku londini, undantikið Mauritius, ið fekk vent um til frían búskap fyri árum síðan og fólkið á hesi oynni eystan fyri Afrika hevur heystað vælferð.