Lívligt kring Trongisvágsfjørð
Heilt fitt av ferðslu hevur verið á Trongisvágsfirði seinastu mongu mánaðirnar, nú veiðitíðin fyri makrel, sild og svartkjaft hevur verið og er í hæddini.
Leygardagin stevndi Gitte Henning inn eftir Trongisvágsfirði, fyri at avreiða 1100 tons av makreli. Gitte Henning mátti bíða eftir at sleppa framat, tí Jupiter lá og landaði.
Sunnudagin legði eisini Finnur Fríði at Tvørakei. Finnur Fríði landar í løtuni og teir hava 1200 tons av makreli. Makrelurin er allur fiskaður í ES-sjógvi.
Av havnarlagnum frættist eisini, at Jupiter longu er á veg innaftur við makreli. Seinni í vikuni kemur Eystnes hjá Smyril Line eftir fiskaplattum frá Varðanum Pelagic.
Longur vesturi á havnarlagnum er eisini byggivirksemi í gongd, har Delta Seafood heldur til.
Tvøroyar kommuna skrivar á facebook-síðu síni, at í gjár var eyka lívligt virksemi, tí tvey stór, fremmanda skip løgdu at á Drelnesi. Fyrst var tað “reefarin” Coppename, ið legði at. Coppename er smíðað í 1990.
Síðan legði stóra russiska fiskipið, Arctica, at, undir liðini á Coppename. Arctica er bygt í 1970, er 120,7 metrar langt og 19,03 metrar breitt.
Skipini fóru beinanvegin í gongd við at avskipa sínamillum og sambært havnastjóranum, Jón Boga Guttesen, so er tað fyrstu ferð síðan 2005, at russar hava avskipað á Trongisvágsfirði.
Havnastjórin sigur, at hann av og á hevur havt samband við russisk skip, ið hava tosað um, at pláss ikki er fyri teimum norðanfjørðs.
Skamt frá Drelnesi tekur nýggi bygningurin, sum MTV byggivirki er í ferð við at reisa, seg upp. Bygningurin verður uml. 1000 fermetrar – meginparturin í einari hædd, skrivar Tvøroyrar kommuna.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur