4.800 náttúruvísindafólk, 2.800 læknar, 770 býfluguhaldarar, 2.000 umhvørvisfelagsskapir og 180.000 onnur fólk úr 202 ymsum londum og landaøkjum hava skrivað undir eina altjóða áheitan, sum heitir á heimsins stjórnir, at steðga uppsetingini av 5G. Hetta boðar Erbylgjufelagið frá sambært STOP5Ginterna6onal.org. Erbylgjufelagið leggur afturat, at mótmælistiltakið ikki verður í Føroyum. 

Málið við mótmælistiltøkunum er, at steðga uppsetingini av milliónum av 5G-antennum á jørðini og 50.000 fylgisveinum í rúmdini. Ætlanin er eisini, at náa stjórnarembætisfólk og stýrir í altjóða felagsskapum sum ES, ST og WHO við boðskapinum.

5G fer at økja strálingina ógvusliga allastaðni, frá einum degi til annan  – í býum, útjaðaraøkjum, viðarlundum, náttúrulendi, tjóðarparkum, høvunum, í Grønlandi og á Antarktis. Sum er, eru nakrir kilometrar millum hvørja fartelefonmastur, men við 5G verða smáar, men kraftamiklar antennur uttan fyri triðjahvørt til fimtahvørt sethús. Harumframt fer talið av fylgisveinum, sum eru í ringrás kring jørðina, at økjast frá 2.000 til 50.000, skrivar Erbylgjufelagið. 

Millum teirra, sum skipa fyri tiltøkum tann 25. januar 2020, eru fólk, sum longu hava fingið so mikið álvarsligan skaða av tráðleysum tólum, at tey als ikki kunnu taka lut í samfelagnum longur. Tey stríðast fyri egna lívi sínum, lívinum hjá børnunum, fyri skordýrum, fuglum, djórum og okkum øllum, skrivar Erbylgjufelagið.