Sig so, at tað ikki loysir seg hjá okkum menniskjum at leggja alla orku í at klára seg væl í lívinum. Nýggi finski forsætisráðharrin var kassadama í einum handli sum ung. Tað skulu aðrir politikarar ikki undirmeta.

Tað gav at býta, tá estiski innanríkisráðharrin alment glósaði um starvsleiðina hjá finsku Sanna Marin (navnið ljóðar eisini so jarðbundið á føroysum), so at sjálvur forsetin í Estlandi mátti biðja grannan fyri norðan umbera sín ráðharra.

Sanna Marin er bert 34 ára gomul og konubrot úr smáum korum. Hon er leiðari í finsku samgongustjórnini við ikki færri enn 5 flokkum. Tað mest merkisverda er, at 4 av hesum 5 stjórnarflokkunum hava kvinnuligar leiðarar, sum allar eru yngri enn 35 ár. Hetta man vera eindømi í heimssøguni.

Finnar eru úrmælingar á so mongum økjum og hava livað fittan part av síni tíð undir russiskum jarnhæli,  og varð enntá álopið av Sovjet í 1939/40.

Tað er nakað serligt við mayarunum, ið búleikast í Finnlandi, Estlandi og Ungarn. Hesi smáu og fámentu lond niður ígjøgnum Eysturevropa, Finland við 4,5 mió, Estland við bert 2 mió og Ungarn við 10 mió íbúgvum og teirra gátuføra máli við eintali og fleirtali men 20-25 føllum í hvørjum tali, sláa langt yvir sín vektklassa, sum tað eitur á amerikanskum boksaramáli.

Diplomatiska óhappið millum Estland og Finland hendi í einum útvarpspráti, tá 70 ára gamli Mart Helme, leiðarin í tí høgravenda flokkinum Ekre, kom til at siga: ”Nú síggja vit, hvussu ein krambagenta er blivin forsætisráðharri , og hvussu gøtuaktivistar og fólk uttan hægri útbúgving eisini eru komin í stjórn.”

Helme hevur við síni leysu tungu ofta komið sínum forsætisráðharra, Jyri Jatas, leiðara í Miðflokkinum, í kløtur. Estland er heldur ikki ‘fyri notting’, tá um gávað konufólk í politikki ræður. Estiski forsetin er nevniliga eisini kvinna, Kersti Kaljuleid, ið segði, hvussu forleygin hon var av útsøgnunum hjá Helme.

Eisini estiski innanríkisráðharrin Marti Helme hevur síðan biðið Sanna Marin halda sær tilgóða fyri at vera so lættmyntur. Hann var misskiltur og vildi undirstrika, hvussu tað ræður um hjá einum lítlum landi at hava stóran sosialan mobilitet, so øll talent hava kjans at tæna sínum fólki sum best.