Sjálvt teir frægastu sjarmørarnir eldast, og nakrir halda tað vera tunga lagnu. Jack Nicolson gramdi seg alment, tá hann, farin av 80, ikki skuldi bjóða til at dára damur longur. Tað plagdi ikki at vera nakar trupulleiki í góðum árum.

Fyri jól gjørdi stóri gessurin í Hollywood, Harvey Weinstein, semju at gjalda 30 kvinnum, ið hava ákært hann fyri neyðtøku, 170 mió kr fyri tort og sviða. Henda útreiðsla, nú Weinstein av sínum dárskapi hevur mist bæði konu og børn, skuldi loyst tey flestu sivilu rættarmálini ímóti honum (smbr NYT).

Men so lætt sleppur hesin syndarligi mannskapningur neyvan, tí 6. januar fór Weinstein í rættin móti teim kvinnum, ið ikki hava gjørt semju fyri pening.

Weinstein sá illa út, tá hann støplaði í rættin í við gangirammu, sum fleiri hildu vera ein roynd at fáa samkenslu, nú hann skal undir skurð í rygginum. Onkur var so speiskur at halda, at ein so virkin maður mátti hava fingið ilt í ryggin.

Undan kriminalrættarfundinum á Manhattan helt filmsmogulurin tíðindafund í sjúkrastovuni. Har førdi hann fram, hvussu órímiligt tað er, at hann nú verður ákærdur og revsaður fyri at vera tann “gloymdi maðurin, hvørs slóðbrótandi arbeiði” fyri so nógvar kvinnur upp á toppin í filmsvinnuni nú var gjørt til einkis.

Weinstein bedýraði sína óskyld í teim kriminellu ákærum, ið regna niður yvir hann. Mangur gevur hon rætt í, at tað kann ikki vera lætt at halda fingrarnar frá øllum teimum mongu hálv ílætnu nymfunum, ið eru avmyndaðar hangandi  sum perlubond um hálsin á filmsframleiðaranum fyri at fáa hansara stuðul til at koma sær fram í Hollywood.

Miðlarnir halda, tað eru mest tær, ið ikki høvdu gávur til film, ið síðan hava rættarsøkt teirra fyrrv. hetju og stuðul undir felags herferðini, “Me too.”