Tað er ikki bert føroyski búskapurin, sum fær treytaleys krav frá Beijing, at um vit ikki keypa G-5 teletøkni frá Huawei, ið kommuinistastjórnin kann misnýta til at njósnast á hvørjum føroyingi, so gevst Kina at keypa fiskavørur, serliga laks úr Føroyum. Vit eru bert eitt dømi um harðrenda kinverska imperialismu.

Beijing royndi at keypa Grønland herfyri við tilboð at fíggja grønlendskar flogvallir fyri miljardir. Danmark noyddist at leypa til og byggja flogvallirnar.

Ringast sperd eru asiatisk og afrikansk lond, ið eru fallin fyri freistingini at siga ja til lokkandi tilboð um lán úr Kina til íløgur. Afrika er mest fyri skotum, eftir at Vestanlond hava pumpað túsundtals mia av evrum og dollarum niður í Afrika við syndarliga smáum úrslitum at vísa á afturfyri.

Stórur partur av vesturlendskum íløgum, neyð- og menningarhjálp í Afrika eru farnar fyri hund og heyk, helst til at mutra afrikanskar politikarar. Fólkatalið á hesum meginlandi er 5-faldað, síðan londini fingu sjálvstýri eftir kríggið. Bert fá teirra breyðføða sítt fólk, men politisku leiðararnir eru hovríkir.

Nú hava vesturlendingar fingið kapping frá Kina, sum yvirbjóðar Vestanlond í at mutra Afrika. Avísin The East African í Nairobi ávarar ímóti, at Kenya verður næsta land har, sum verður fangað í kinesisku skuldardeyðsfelluni.

Tað, sum nú hendir í Kenya er hitt sama, ið hendi Sri Lanka: Besta djúphavn á eystaru síðu á Afrika er hon í Mombasa. Hon verður nú ognartikin av Kina í 99 ár, tí stjórnin í Nairobi klárar ikki at gjalda lánskuld til Beijing aftur fyri íløgur í kenyanska infrakervi, jarnbreytir og vegir, við panti í Mombasa. Tað sama hendi við Hambantosa, størstu havn í Sri Lanka og størstu havn í Eritrea.

Zambia stutt sunnan fyri Kenya er komið í rasshaft og er noytt at handa vegir, jarnbreytir, búnarjørð og landsins bestu floghavn í pant til Beijing fyri skuld

Skuldin hjá fleiri øðrum afrikanskum londum er líka lemjandi, so tey klára ikki at gjalda Kina aftur, men noyðast at lata Beijing eiga risa ognir í londunum. Maldivurnar í Indiska Havi hava selt seg til Kina fyri brýr, flogvallir og vegir.

Amerikanska CNN gevur ilt av sær. Hóast henda SV-støð er skammleyst Democrat og lemjir USA, meðan Trump er forseti, so pínist CNN av, at kinverjar yvirtaka meir og meir av 3-heimi, so USA verður kroyst burtur.