Á landsráðstevnuni í St. Louis samtyktu 438 umboð, 53% av teim møttu, at amerikanska Metodistkirkjan skuldi halda fram ikki at víga onnur hjún enn ein mann og eina kvinnu og ikki at loyva samkyndum prestum at búgva saman.

Hetta er sama støða sum Katólska og flestu fríkirkjur í USA hava. 47% av møttum umboðum valdu at draga LGTB-línuna á landsstevnuni í fjør og taptu.

So skuldi verið friður í Metodist kirkjuni, sum er 3.størsta trúarrørsla í USA eftir ta Katólsku- og Baptistkirkjurnar í Suðurstatunum.

Metodistarnir byrjaðu í Bretlandi í 18. øld, og stovnarar vóru John og Charles Wesley og George Whitefield. Tá vóru 3 mió fríkirkjufólk í Bretlandi. Ì dag eru 70 mió metodistar í heiminum, og tey hittast í 32.000 ymsum kirkjum.

12 mió metodistar eru í USA, og forsetarnir G. W. Bush, William McKinley, Rutherford Hayes, Gen Ulysses S. Grant høvdu sína gongd í hesi trúarrøslu.

Ósemjan millum metodistar um samkynd parløg og prestar er fleiri ára gomul og hevur órógvað samkomuarbeiðið nógv, so 1000-tals siðbundin kristin hava leitað sær til aðrar samkomur. Sama er hent í fleiri ‘liberalum’ kirkjum, eitt nú hava tann episkopala og presbyterianska kirkjum mist miljónir av limum.  

Sum ikki eina ferð nokta tey ‘liberalu’, t.e. vinstrahallu, at boyggja seg fyri einum demokratiskum meiriluta. Minnilutin, ið krevur LGBT-reglur fyri pør og pastorar, hava boðið meirilutanum, 39 mió USD fyri at byrja fyri eg sjálvan og at stovna sína egnu siðbundnu Metodist-rørslu.

Trúarsamfeløg í øðrum Vestanlondum fáa ivaleyst somu lagnu, men neyvan í 3.heimslondum. Í eitt nú í Afrika eru tey siðbundnu kristnu stórur meiriluti. 

Metodistar hava havt risa sosiala og búskaparliga ávirkan, serliga millum verkafólk og fátæk í flestu londum síðan ídnaðarkollveltingina, tá Vestanlond sluppu úr miðøld inn í nútíð. Fjøld av metodistum skaptu stóran framburð.

Tað eru serliga akademiskir metodistar, t.m. 93 universitetsrektorar, ið hava strongt á at nútíðargera trúarsetningar og mannagongdir á kynsøkinum. Eins og Labour í Bretlandi og Dems í USA virða teir ikki demokratiska meirilutan.

Nú hava so tey trúarføstu valt at lata seg keypa úr móðursamkomuni fyri ein alt ov lágan prís, 39 mió USD úr kirkjunar stovnsogn, mest fyri frið skyld.

Amerikanarin Dean M. Kelly hevur skrivað bók ‘A Study in the Sociology of Religion,’ um hví trúarfastar kristnar samkomur vaksa, meðan tær meiri liberalu, t.e. tær, ið royna at laga seg til øll tíðarrák, minka.

Kelly o.a., eitt nú Alexander Griswold, hava skrivað nógv um evnið. Hagtøl frá ‘Center for the Study of Global Christianity’ vísa, at fyri 120 árum síðan vóru uml. 80 mió evangeliskt kristin kring heimin og bert 1 mió hvítusunnufólk.

Í dag eru tølini 354 mió protestantisk og 694 karismatiskt kristin, 100-tals mió í 3.heimi. Kanningar í Kanada, Australia og enntá Svøríki vísa somu gongd.

Liberalar kirkjur, anglikansk, episkopal, presbyteriansk og katoliskt kristin fækka, og trúarfastar hvítusunnu-, baptist o.a. karismatiskar kirkjur fjølgast.