Ring og góð bókatíðindi úr Bretlandi
Hvussu hevur prentaða bókin tað sum miðil til vitan, upplýsing og undirhald.
Menniskju hava frá fyrndini lært mest um hvør annan og lívið yvirhøvur við talaða orðinum. Men fyri fólk, ið vildu vita meiri, kom skrivtmálið og serliga prenttøkni frá Gutenberg í 1440 væl við. Eftir Trúbótina lærdi fjøldin at lesa.
Prentaða bókin hevur verið og er enn týdningarmesta keldugoymsla til tær royndir, sum menniskju hava gjørt higartil, og sum eru til skjals. Bóka- og skjalasøvn hava verið høvuðsálit, tá vit søktu vitan út um tað vanliga.
Bøkur eru enn høvuðskeldur til ta vitan, ið menniskju leita til, tá um teirra útbúgving ræður, serliga í hugvísindum. Eingin kann ímynda sær eina ástøðiliga vitan við prógvi, verkligum ella akademiskum, uttan bøkurnar.
Hin vegin fær teldutøk vitan størri og størri týdning, tá ræður um at granska hagfrøðilig og náttúruvísindalig evni, serliga til útrokningar.
Men bókin fyllir í dag nógv minni enn snildfon og telda, tá fólk leita sær undirhald, tíðindi og skjótt funna vitan. SV er til tíðindi og serliga undirhald.
Tí er væntandi, at bøkur við djúpari vitan verða minni brúktar, nú tíðin tykist flestum knøpp sammett við fyrr, tá bert talaða og skrivaða orðið var álitið.
Sonevndir bókormar hava altíð verið ein minniluti, men tey flestu av okkum hava eina bók ella fleiri við hondina, ið vit lesa í til undirhalds ella vitan.
Telda, snildfon og SV taka nú alsamt meir av okkara tíð (hjá nógvum eru tey tíðarspill upp í tímar dagliga), og SV stimbrar heilan minni enn lesnaður.
Bretland man vera sum Vestanlond flest, tá um bøkur ræður. Haðan bar The Times tey tíðindi herfyri, at bretskar kommunur hava stongt 700 bókasøvn og bókalánstænastur síðan 2010. (Svarar lutfalsliga til knapt 1 færri í Føroyum).
3.600 bókasøvn eru enn opin, har eisini 50.000 sjálvboðin arbeiða. 8 mió aktivir bókalænarar eru í Bretlandi. Tað tykist heldur lítið av lesandi fólki.
Tey góðu tíðindini frá Nielsen BookScan í Bretlandi eru, at bókamarknaðurin hevði sítt 4. ár á rað í vøkstri, 0,2% øktari prentbókasølu við 2,1% størri virði.
Mest lisið í farnu viku
Samband
Heygsvegur 8
490 Strendur