Kollfirðingar fáa aldubrótarar til bátahylin við Sjógv
Í næstum fara kollfirðingar at fáa aldu-brótarar til bátahylin við Sjógv í Kollafirði. Tað hevur verið eitt ynski frá bátaeigarum, sum hava bátar í bátahylinum við Sjógv, at fáa vart innsiglingina móti vindi av útsynningi og vestri.
Tað eru 64 bátapláss í bátahylinum. Í 2016 vórðu nýggjar bátabrúgvar við tilhoyrandi báta-bummum lagdar út í bátahylin. Útsynningur og vestan liggur rættuliga tráur inn í innsiglingina og ger, at tað verður óslætt í pørtum av bátahylinum.
Tveir møguleikar eru at verja innsiglingina móti vindi, sum kemur út eftir fjørðinum, annar er grótkast og hin er ein flótandi aldu-brótari.
Í fíggjarætlanini fyri 2020 eru avsettar 1,6 mió krónur til aldu-brótara í Kollafirði.
Metingar av kostnaðinum vísa, at eitt 60 metrar langt grótkast kostar 3.1 mió. krónur, meðan ein tilsvarandi langur flótandi aldu-brótari kostar 1,6 mió. Tilmælið er tí at leggja út 60 metrar av flótandi aldubrótara.
Bæði vinnu- og fíggjarnevdnin hava samtykt at taka undir við tilmælinum, sum kemur fyri á býráðsfundi hóskvøldið.
Mest lisið í farnu viku
Samband
Heygsvegur 8
490 Strendur