LEIRKERIÐ HEIÐRAÐ - hitaði og fjálgaði
Bókmentaarvurin, sum Zacharias Zachariasen hevur lagt eftir seg telur ikki færri enn 124 bøkur og 200 bløð.
Tey eru óivað mong, sum hava undrast yvir, at ein mentamaður sum Zacharias Zachariassen aldri hevur fingið lut í almennu útbýtingini av mentanarvirðislønum landsins. Tað er eingin loyna, at Forlagið Leirkerið við bróðurduettini Zacharias Zachariassen og Flóvin Tyril hava ígjøgnum fleiri áratíggir ríka land og fólk við teirra bókmentum, blaðgreinum og sangum.
Nú Zacharias er farin um sýnuna verður hann heiðraður av landsins myndugleikum fyri tað stóra bókmentaliga avrik, sum teir báðir, Zacharias og Flóvin igjøgnum forlagið Leirkerið, hava lagt út á tí kristiliga vonginum í føroyska samfelagnum.
Tað var nývaldi landsstýrismaðurin í mentamálum, Jenis av Rana, sum fekk heiðurin í ár at skula handa tær tríggjar árligu heiðurslønirnar, og hann valdi at geva tað serstøku virðislønina til Forlagið Leirkerið.
Fagnaðarløtan fór fram í Sjónleikarahúsinum í Havn mikukvøldið 15. januar fyri fullsettum húsi. Slóðbrótarin innan føroyskan tónleik Simme Arge Jacobsen og fólkasangarin Hanus G. Johansen fingu hvør sína heiðursløn frá landsstýrismanninum fyri síni stóru avrik á tónleikaøkinum.
Tað var Flóvin Tyril, sum vegna Leirkerið, tók ímóti heiðurslønini, sum varð handað av mentamálaráðharranum Jenisi av Rana. Jenis segði m.a. : “Síðani 1982 hevur forlagið Leirkerið staðið fyri mennandi arbeiði innan útgávu av andaligum bókum, sálmum og bløðum..................Miðvísa og stillføra virksemið hjá Zachariasi og Flóvini handan Leirkerið hevur ríkað og lívgað føroyska mentan innan kirkjur og samkomur um alt landi...............Hetta hevur verið ein týdningarmikil íblástur hjá mongum, og rúgvismikla tilfarið, íroknað granskingar, kemur at standa sum ein týðandi varði í føroyska bókmentaheiminum!” segði Jenis av Rana, tá hann handaði serstøku virðislønina til Flóvin Tyril, sum vegna Forlagið Leirkerið takkaði fyri heiðurin. Flóvin segði í samrøðu við Kringvarpið, at “hann kendi hetta sum ein stóran heiður, og at tað bæði hitaði og fjálgaði.”
Svenning av Lofti, sum var til staðar í Sjónleikarhúsinum, tá heiðurslønirnar vóru handaðar, tekur soleiðis til í viðmerking í miðlunum: “Zacharias, prædikumaður, rithøvundi, týðari og skald, legði í 82 ára lívi sínum úr hondum virðismikið sang- og bókmentaverk, ið fáum unnist at útinna. Uppiborið var, at hesin heiður varð vístur honum og beiggjanum, Flóvini, hesum báðum lítillátnu brøðrunum, ið einki kravdu av almennu Føroyum ella øðrum, men sum í ósjálvsøkni útintu eitt kristiligt, mentanarligt og málsligt valaverk samtíð teirra og føroysku tjóðini at gagni og Gudi til heiður og æru - ein heiður í tøkum tíma!”
Tað verður sonur Zacharias, Jógvan Zachariassen, sum kemur at leiða forlagið Leirkerið framyvir. Virðislønin er upp á 50.000,00 krónur.
Kristiliga Tíðindatænastan
v/poul jóhan djurhuus
Tlf: +298 228314
gjaranes@gmail.com
Mest lisið í farnu viku
Samband
Heygsvegur 8
490 Strendur