Ikki bert eru fólk vorðin prúðari men eisini bilar rúmligari
Hvørt má fylgja eftir øðrum. Viga vit í miðal 10 kg meiri enn fyri 40 árum síðan, so er rímiligt, at tað, vit brúka, verður víðkað, so tað passar. Hetta geldur ikki bert klæði, men eisini aðrar brúkslutir, eitt nú innbúgv.
Bilarnir eru einki undantak. Ikki bert eru fleiri 4-hjólsakfør og serliga størri flutningsakfør nú enn fyrr, ið eins og aðrir bilar nú kosta nógv minni lutfalsliga sammett við okkara inntøkur. Arbeiðsakfør eiga sína stóru tøkk fyri økingina í okkara framleiðsluorku og tær nógvu inntøkur, ið stava frá henni.
At bert 600 bilar vóru í Føroyum í 1955 komst mest av, at tey fæstu tá høvdu ráð til at keypa sær bil, og bert 100 km av skikkaðum koyrivegum vóru íalt. Nú eru 500 km av tvíbreytaðum koyrivegum (umframt 19 tunlar, 80 km íalt).
Tann fantastiska kapitalismuni byggir á vinnu- og persónsfrælsi, privatan ognarrætt, rættartrygd og fólkaræði. Kapitalisman við vaksandi produktiviteti av betri og virknari framleiðslutólum á sjógvi og landi hevur skapt 90% av øllum inntøkuvøkstri, og útjavningin av inntøkum bert 10% av økingini.
Men eftir hesa undirvísing í heimsins veruligu støðu fara vit aftur til breiddina á okkara bilum farnu 25 árini, ið eru breiðkaðir sum okkara kropsvekt.
Í 1998 var ein Ford Fiesta 178 cm breiður. Í dag er Fiesta 196 cm.
Fyri 25 árum síðan var Vauxhall Astra 185 cm breiður. Í dag er Astra 198 cm.
Í 1998 var Renault Clio 163 cm breiður. Í dag er hann 196 cm breiður.
Stovnurin Direct Line upplýsir hesi tøl fyri nakrar bilabreiddir, ið altso eru víðkaðar eftir okkara longda miðjumáti. Hygg í spegilin ella royn brúdleypsklædningin ella kjólan frá 1998 í klædnaskápinum.
Í hesum stubbanum skriva vit einki um flúgvarsetur, ið má bíða til seinni. Har er gongdin øvugt, tí tá var meiri pláss í ferðaflogførum til hvørt ferðafólk, ið vóru nógv færri sammett við nú orsakað av flogseðlaprísinum. Í dag verða flogferðafólk nógv meiri stúvað saman fyri at lækka prísirnar.
Hvussu gongdin við bilabreidd verður frameftir, hongur í tí dulda. Kanska henda heilsuframstig, ið gera, at okkara kropsvekt minkar aftur. Tað man treingja til, tá ein sær eitt nú amerikansk løgreglufólk, serliga í trygdarvestum.
Mest lisið í farnu viku
Havstovan tilmælur at stongja tað mesta
Samband
Heygsvegur 8
490 Strendur