Heðin Mortensen vísir á, at hestfólk óttast nú at missa eykatúrarnar við Strandferðsluni, tí eingin fígging er sett av til leiðina út í oynna. 

- Hestfólk hava verið glað fyri eykatúrarnar við Spógvanum, sum gav teimum nógv fleiri møguleikar at búgva í Hesti og arbeiða í Havn. Her verður víst til morguntúrin kl. 7, túrar hvønn gerandisdag kl. 14.30 og kl. 17.10, og so túrin hvønn dag kl. 19.10 av Gomlurætt, sigur Heðin Mortensen. 

Heðin Mortensen vil vita, hvat kemur ístaðin fyri túrarnar við Spógvanum. Hví ongin fígging er sett av til rutuna út í Hest, nú nýtt fíggjarár júst er byrjað? Og um hestfólk kunnu rokna við at fáa færri túrar av hesum ávum? Eisini vil hann hava landsstýrismannin at tryggja, at hestfólk í minsta lagi fáa eins nógvar túrar út í Hest, sum tey fáa í dag. 

- Tað er so ómetaliga einfalt. Skulu fólk fáast at búgva fast í oynni, so má ein trygg og góð farleið leggjast beinanvegin, sigur Heðin Mortensen.