Nótabáturin, Sighvatur Bjarnason, pumpar í løtuni deyðan fisk úr aliringunum.

Fiskasjúku-leiðarin hjá íslendska matvørueftirlitinum, Gísli Jónsson, metir, at talan er um í minsta lagi 100 tons av laksi, sum er deyður.

Tað skriva norsja “ilaks” og íslendska blaðið “Stundin”.

Stórur deyður fiskur - millum seks og níggju kilo - samlast á botninum á aliringunum. Arnarlaks hevur umleið 4.000 tons av laksi í sínum alibrúkum.

Gísli Jónsson sigur, at laksadeyðin er ein hin ringasti, hann hevur verið vitni til á Vestfiðrunum, eftir at Arnarlax byrjaði virksemið har. 

Meðan deyði fiskurin verður burturbeindur, er eisini nógvur fiskur, sum vísir seg at vera ógvuliga veikur. Hann skal eisini slaktast skjótast tilber.

Veðrið í økinum er ringt, einir 30 m/s, og tað batnar ikki við tað fyrsta sambært veðurstovunum. Samstundis er kalt í sjónum, bara 2 hitastig.

Stóra og nýggja norska sláturskipið, Norwegian Gannet, varð boðsentr á til Íslands, har tað skal hjálpa Arnarlax at slakta veika laksin. Sambært Marine-Traffic er skipið nú komið undir Ísland.

Sum skilst er tað ringa veðrið í Íslandi seinastu dagarnar, sum er orsøkin til, at nógvur laksur er deyður.