Miðumátið longist á heiløgum monnum
Fiti er vaksandi avbjóðing í Thailandi, skrivar the New York Times, og mest leingist miðumátið hjá heiløgum monnum, landsins buddistisku munkum.
Í katólsku tíðini vóru eisini nógvir heilagir menn og kvinnur í nú protestantiska Evropa og trúarrætningar. Vit kenna nøvn sum fransikanar, dominikanar, karmelitiskar, benediktinskar og augustinskar kleystur skipanir. Hvør munka- og nunnuskipan fekst við sítt, t.d. heilsurøkt, frálæru, vælgerandi arbeiði osfrv.
Nakrir kallaðu seg trappistar, ið ikki tosaðu sínámillum, men brúktu alla tíðina til at meditera. Ymsar av nevndu munka- og nunnuskipanum livdu av at bidda, og tað varð roknað fólki til sálarbótar at geva biddaramunkum, mendikanum, mat og drekka. Tó duldist ikki fyri, at nakrir biddarar í víðum munkakappum livdu væl. Matarlystur er jú óheftur av tí, vit trúgva og gera.
Hesar munkaskipanir handan væl bygdar og vardar kleysturmúrar við stórum jarðarognum til taldu túsundtals fólk, og tá Pávakirkjan átti útivið helvtina av jørðini í Evropa, koppaði búskapurin, eins og nútíðar búskapir, tá hitt almenna leggur hald á helvtina av samlaðu framleiðsluni í samfelagnum. Sostatt minnir katólska kleysturskipanin ikki sørt um almennar starvs- og áhugabólkar í dag.
Í Norður- og Vesturevropa gjørdu fólk til síðst uppreistur, brendu og brutu kleystrini niður og róku munkarnar út ímillum onnur fólk at arbeiða fyri føðina.
Thailand er á mangan hátt átøkt Vestanlondum. Livistøðið er hækkað nógv í okkara tíð, og longu nú gremja heilsumyndugleikarnir í Thailand seg um, at triði hvør maður vigar meiri, enn gott er. Feitastir eru buddistisku munkarnir, og meiri enn annar hvør teirra vigar ov nógv. Fiti er blivin ein heilsuvandi.
Støðan er nú so hættislig, at myndugleikarnir rópa varskó og heita á fólk um ikki at geva hesum buddistisku munkum í ljósareyðum safronkappum ov fitandi kost og biðja munkarnar vanda sær betur um matin, teir eta.
New York Times skrivar, at buddistar mugu ikki eta eftir middag, men ofta eta landsins heiløgu menn í meira lagi fyrrapart, ofta skundmat og søtar drykkir.
Nú hava myndugleikarnir álagt kleystrum at geva munkum stutt belti við fáum holum í, so teir kenna á miðuni, nær vektin fer upp um tað, ið gott er. Eisini verður mælt til, at munkar arbeiða meiri kropsligt og meditera og biða minni.
Mest lisið í farnu viku
Putin vil hava Biden og ikki Trump
Undirskot landskassans 150 milliónir
Samband
Heygsvegur 8
490 Strendur