Zimbabwe er eitt serligt studium í afrikanskum sorgarleiki. Har hevur bert gingið aftur á hond, síðan hvíta minnilutastýrið við Ian Smith sum forsætisráðharra handaði svarta meirilutanum valdið í 1980 (40 ár síðan).

Tá var Zimbabwe breyðkurvin í Afrika. Nú er landið biddaraskálin í Afrika.

So seint sum í fjør doyði fyrrv. forsetin í næstan 40 ár og seinastu 20 árini landsins sosialistiski diktator, Robert Mugabe, 94 ára gamal.

Hann var næst seinasta vón í Afrika hjá Vestanlondum at stuðla.

(Nelson Mandela var hin seinasta vónin, men í Suðurafrika hækka hagtølini ræðandi fyri brotsverk frá morðum og neyðtøkum til innbrot, gøtuálop og stuldur. Tað má bíða til næstu Andøvsløtu).

Men Zimbabwe eftir Mugabe er enn ein hungrandi ruðuleiki við hernarstýri.

Nýggjasta gølan er, at 38 ára gamla kona varaforsætisráðharrans, hon eitur Marry Mubaiwa, er ákærd fyri at hava roynt at myrða mannin, meðan hann lá á hjálparleysur á intensivari deild á sjúkrahúsi í Suðurafrika. (Cape Times).

Marry Mubaiwa royndi at sløkka andingar- og hini lívbjargandi tólini, ið hildu 63 ára gamla ráðharranum á lívi. Læknarnir fylgdu við heilsuni á skíggjum uttan fyri sjúkrastovuna, lupu til í evstu løtu og bjargaðu honum frá konuni.

Onkur undrast á, hví ein forsætisráðharri fer til Suðurafrika at fáa heilsubót fyri krabbamein í vælindinum. Men sjúkrahúsini í Zimbabwe hava eftir 40 ár av sosialismu hvørki heilivág, heilsutól ella læknar til at bjarga nøkrum.

Ein ímyndar sær, at frægasta sjúkarhúsið í Zimbabwe minnir um eitt fletting-arrúm í einum føroyskum bóndagarði, tó uttan el-megi hálvt samdøgrið.

Í Suðurafrika eru flestu læknar enn hvítir, hóast landsins svørtu politisku leiðarar nú arbeiða av kraft fyri at sleppa av við øll hvít fólk, ið eru eftir.

Ein onnur ákæra, ið rætturin í Harare hevur reist ímóti ráðharra frúuni er, at hon hevur roynt at smugla 7 mió kr úr Zimbabwe. Tað er stórkriminelt.

Tann sjúki varaforsætisráðharrin hevur eisini tann ivasama heiður at vera herovasti í Zimbabwe, tá Robert Mugabe varð rikin frá valdinum í 2017.