Upplýsing um stuðul til politiskar flokkar til 2. viðgerð
Í morgin, týsdagin, kemur uppskot um løgtingslóg um privatan stuðul til politiskar flokkar, løgtingslimir og valevni til 2. viðgerð í Løgtinginum.
Uppskotsstillarin, Kristina Háfoss, løgtingskvinna og fyrrverandi landsstýrismaður í fíggjarmálum, sigur m.a. soleiðis í viðmerkingunum til uppskotið:
“Neyðugt er við fullum gjøgnumskygni, tá tað ræður um tann stuðul, sum politiskir flokkar, løgtingslimir og valevni fáa.”
Kristina Háfoss sigur, at endamálið við lógini er at tryggja, at almenningurin altíð kann fáa fult innlit í, hvussu politiskir flokkar, løgtingslimir og valevni fíggja valstríð og virksemið, herundir hvør privatur stuðul verður latin flokkum, løgtingslimum og valevnum.
Hetta verður gjørt við, at politiskir flokkar skulu gera roknskap, ið skal fevna um upplýsingar um inntøkukeldur og stuðul floksins. Herundir upplýsingar um møguligan privatan stuðul. Tað skal eisini upplýsast í frágreiðing til roknskapin, um løgtingslimir ella valevni floksins fáa privatan stuðul.
Um talan er um uttanflokka valevni ella uttanflokka løgtingslim, og viðkomandi fær privatan stuðul samsvarandi hesi lóg, skal viðkomandi lata fyrisitingini hjá Løgtinginum frágreiðing um stuðulin.
Og almenningurin kann fáa innlit í roknskapir hjá politisku flokkunum og frágreiðingar frá uttanflokka valevnum og løgtingslimum hjá umsitingini í Løgtinginum.
Í dag eru politiskir flokkar, løgtingslimir og valevni ikki áløgd at upplýsa alment um møguligan privatan stuðul. Hetta ger, at almenningurin ikki veit um - og í hvønn mun politiskir flokkar, løgtingslimir og valevni eru privat stuðlað og harvið hava fíggjarligt tilknýti til privatar stuðlar, sigur Kristina Háfoss m.a. í viðmerkingunum til uppskotið.
Og uppskotið kemur altso til 2. viðgerð í Løgtinginum í morgin.
Mest lisið í farnu viku
Samband
Heygsvegur 8
490 Strendur