Anna Karlsdóttir, sum starvast í granskingarsentrinum fyri menning og planlegging hjá Norðurlendska Ráðharraráðnum, sigur í tíðindaskrivi, at vit eru á veg móti kinesiskum standi - uttan at hava ført eitt-barns-politikk.

Anna Karlsdóttir er ein av høvundunum til nýggja, norðurlendska frágreiðing, har tey hava granskað menningina í fólkatalinum í øllum kommunum í Norðurlondum.

“Vit hava fyrr havt høgt gitnaðarføri ella fertilitet í Norðurlondum, og frágreiðingin hevur verið, at vit hava so góðar skipanir fyri foreldrafarloyvi og barnaumsorg.

Hesar skipanir síggja ikki longur út at hava serliga stóran virknað, og vit líkjast alt meira restini av heiminum, tí talið á føðingum í Norðurlondum er lækkað. Bara í Føroyum verða tað framvegis borin fleiri í heim enn tað doyggja,“ sigur Anna Karlsdóttir við forskning.no.