Spøkilsisfarmaskip endað sínar dagar í Írlandi
Eitt farmaskip, sum hevur rikið fyri vág og vind síðan á heysti 2018, er nú rikið á land uttanfyri Cork har suðuri í Írlandi.
44 ára gamla skipið, MV Alta, var á veg úr Hellas í Grikkalandi til Haiti hinumegin klótina, tá tað fekk álvarsamar trupulleikar í ein landsynning úr Bermuda í oktober 2018.
Skipið hevði verið úr drift í 20 dagar, tá manningin fekk hjálp frá amerikonsku bjargingartænastuni, sum at enda flutti tey tíggju, sum vóru umborð, av skipinum.
MV Alta rak síðan fyri vág og vind yvirum aftur Atlantshavið móti Afrikonsku vesturstrondini.Hagani hevur skipið flutt seg norðureftir framvið Portugal og Spania, til nú tað at enda er rent á land við Ballycotton, sunnanfyri írska býin, Cork.
Skipið er 77 metrar langt, er skrásett í Tanzania, men enn hevur ongin funnið røttu eigararnar. Fyrr hava spekulasiónir verið um, at skipið kann hava verið rænt av sjórænarum, skrivar írska blaðið, The Irish Examiner.
Myndugleikar á staðnum hava eftirlit við skipinum og kanna um nakar oljuleki er.
Írska bjargingartænastan heldur, at skipið liggur trygt sum nú er, men óttast fyri, at illveður kann toga skipið út á sjógv aftur. Um tað hendir, kann tað gerast vandamikið fyri onnur skip í økinum.
Í løtuni eru tað írskir myndugleikar, sum hava ábyrgd av skipinum. Um eigararnir verða funnir, kunnu teir vænta eina velduga bót fyri bjargingararbeiðið, skrivar tíðindablaðið, The Journal.
Mest lisið í farnu viku
Samband
Heygsvegur 8
490 Strendur