Systembolaget stevnir Vivino
Svenska heilsølan, Systembolaget, sum stendur fyri allari sølu av alkoholi í Svøríki, hevur nú stevnt vín-appina Vivino fyri 3 milliónir svenskar - tað sama sum 2 milliónir danskar krónur. Føroyski Heini Zachariassen er ein av teimum báðum stovnarunum av Vivino.
Systembolaget, sum tað almenna Svøríki eigur, stevnir Vivino fyri ólógliga at hava selt og borið vín út til Svøríkis. Sjálv útkoyringin skal vera stóri trupulleikin.
Svøríki hevur strangar reglur fyri sølu av alkoholi, og tað er bara Systembolaget, sum hevur loyvi at selja drykkivørur við meira enn 3,5% av alkoholi - í handlunum.
Vivino hevur loyvi at selja vín gjøgnum appina, men tað er forboðið at senda vínið til Svøríkis. Eftir svenskum reglum hava kundarnir sjálvir ábyrgdina av at heinta drykkivøru við alkoholi, sum verður keypt gjøgnum netið, til landið.
Vivino hevur síðan september í fjør bjóðað sertænastu til svenskar kundar á appini, har tað ber til at keypa vín frá nógvum ymsum seljarum. Hendan sertænastan, har Vivino bjóðar sølu og útkoyring við víni, skal altso vera ímóti svenskari lóg, sambært Systembolaget.
Systembolaget hevur tí stevnt Vivino til patent - og marknaðarførsludómstólin, og krevur altso, at Vivino fær bót uppá 2,09 milliónir danskar krónur.
Vivino er ein app á telefonini, har tað ber til at skanna etikettuna á ávísum víni, og síggja ummæli og prísir á somu fløsku aðrastaðni. 42 milliónir brúkarar um allan heim hava skannað 1,1 milliard vínetikettir higartil. Heini Zachariassen stovnaði Vivino í 2010, og Theis Søndergaard er viðstovnari.
Tað skrivar svenska tíðindablaðið, SVT.
Tað hevur ikki eydnast okkum at fáa nakra viðmerking frá Vivino.
Mest lisið í farnu viku
Samband
Heygsvegur 8
490 Strendur