Hesi 20 møta til tingfundin í dag. R7 hevur ringt til flokkarnar.
Í sambandi við, at Koronafarsóttin hóttir landið, hevur Formansskapurin tikið stig til eina “serskipan” fyri Løgtingið. Bara 20 tingfólk kunnu koma í Løgtingið í dag.
R7 hevur ringt til flokkarnar og spurt hvørji tingfólk møta í tinginum í dag.
Hetta eru tey 20 tingfólkini sum møta til tingfundin, sum er ásettur at vera klokkan 13.30 í dag.
Fyri Sambandsflokkin møta Rósa Samuelsen, Edva Jacobsen, Frimodt Rasmussen og Magnus Rasmussen.
Fyri Fólkaflokkin møta Jógvan á Lakjuni, Beinir Johannesen, Christian Andreasen, Uni Rasmussen og Brandur Sandoy.
Fyri Miðflokkin møtir Bill Justinussen.
Fyri Sjálvstyri møtir Kristin Michelsen.
Fyri Tjóðveldi møta Bjørt Samuelsen, Kristina Háfoss, Beinta Løwe og Hervør Pálsdóttir.
Fyri Javnaðarflokkurin møta Aksel V.Johannesen, Henrik Old, Ingilín Didriksen Strøm og Bjarni Hammer.
Fyri Framsøkn møtir Ruth Vang.
Formansskapurin hevur sent hetta til flokkarnar:
Í sambandi við, at Koronafarsóttin hóttir landið, hevur Formansskapurin tikið stig til eina “serskipan” fyri Løgtingið, um neyðugt verður at kalla tingið saman at viðgera ávís skundmál, soleiðis at ikki øll 33 skulu møta á fundi.
Hetta er neyðugt, um vit á bestan hátt skulu verja okkum fyri, at ein tingfundur ikki skal enda við, at alt tingið aftaná kemur í sóttarhald, tí ein okkara seinni verður staðfestur sjúkur við Covid-19 virusi. Um tingið møtir á tingfundi í einari minni útgávu, kunnu aðrir tingmenn verða tøkir seinni, um tørvur er á tí. Á hendan hátt kann sum frægast bindast um heilan fingur, eins og smittuvandin við tingfundi minkar.
Sambært § 18 í Stýrisskipanarlógini, kann Tingið ikki taka avgerð um mál, uttan at meira enn helmingurin av tingmonnum eru á fundi, tvs. minst 17 tingmenn.
Gjørdur er ein leistur, sum byggir á verandi tingmannabýti, har bæði flokkar og samgonga/andstøða eru umboðað lutfalsliga javnt. Grundað á hetta hevur formansskapurin við heimild í § 14 í Tingskipanini tikið avgerð um, at 20 tingmenn skulu luttaka á tingfundi, og at hinir verða verandi heima. Hetta er lóglig frávera eftir boðum frá Formansskapinum fyri at verja tingið.
Flokkarnir verða umboðaðir soleiðis:
Fólkaflokkurin 5
Sambandsflokkurin 4
Javnaðarflokkurin 4
Sjálvstýri 1
Tjóðveldi 4
Framsókn 1
Miðflokkurin 1
Tingbólkaformenninir velja út, hvørji skulu umboða teirra flokk, og geva hinum boð um at verða verandi heima.
Gjørt skal gera vart við, at umsitingin í tinginum eisini verður skerd til fundin av somu orsøk, og at eingin matur verður serveraður í matarhøllini (bert kaffi, te og vatn).
Mest lisið í farnu viku
Samband
Heygsvegur 8
490 Strendur